بارك الله فيك وجعله في موازين اعمالك
.................................................. ....
بحســره وألم ردّينـــــه = إﮔـعد شوفنه اشبينه
افراﮔك واليسر يحسين = خلّن بالـﮔب نارين
إﮔـعد شوفنه اشبينه
*******
ردّينه يخويه مــن اليسر والشـام
إﮔـعد شوف حال الحــرم والأيتام
تحـﭽـيلك هضمها وقســــوة الأيام
ولا إلها طبـﮒ يبن امّي جفن ونام
السهر سوط ويجرح عيون = وﭽم سوط اليجرح امتون
ويدمــن خــويه هالجرحـين = خلّـــــن بالـﮔلــب ناريـــن
إﮔـعد شوفنه اشبينه
*******
يخويه اﮔـعد وسولفلك همومي اثـﮔال
تعب حيلي يخـــــويه ولا بعـد تنشال
ولخْتَه كل أخـــــو يسألها عن الحال
وهضم الّلي جـــــرالي ذوّب الدلاّل
ماعــدها العده رحمــه = والغربه أشد زحمه
صارن بالـﭽبد رمحين = خلّن بالـﮔلب نارين
إﮔـعد شوفنه اشبينه
*******
من ﮔطعوا وريدك والعده هجمت
صاحـــــت بالخيم فرهود ونّهْبَت
وبنار الضغينــه بيوتنه احترﮔت
ومن الخوف اطفال وحرم فرّت
فرّت كلها من الخوف = صحره والفضه مكشوف
نهب حرﮒ الصواوين = خلّن بالـﮔلب ناريـــــــن
إﮔـعد شوفنه اشبينه
*******
صحت وينك يخويه إلحـﮒ اعلينه
بنار اهــل الحقد والضمه اتـﭽوّينه
ولا عباس ينهض تــــــــرد ﭽفّينه
ومن جـــوده الـﮔمر يـﮔـعد يروّينه
ولا واحد سمع صوتي = كلها امْذَبّحه اخوتي
بسياط وســـبي ماشين = خلّن بالـﮔلب نارين
إﮔـعد شوفنه اشبينه
*******
انهدم خدري يخويه وطاح بنيانه
صعبه وﮔفتي وبوســــــط ديوانه
متْشــفّي ويســـــبني ابن مرجانه
تمنّيتك عـدل وتشــــــوف بلوانه
صعبه وﮔفة الديوان = صرنه فرجه للعدوان
عَمْلات الوكت والبين = خلّن بالـﮔلب نارين
إﮔـعد شوفنه اشبينه
*******
وبعدها الشام اميّه بهضم ودّونه
وفرجـه للخلـﮒ يبن امي خلونه
بديـــوان الذبحكم خويه وﮔفونه
ولبونه المرتضه ﮔـاموا يسبّونه
متْشَــــمّت يحاﭽـينـــــــــه = من عدنه أخذ دَينه
الشماته وشتم ابو السبطين = خلّن بالـﮔلب نارين
إﮔـعد شوفنه اشبينه
*******
اشـــد مــن السبي ياشــدّه شفناها
رقيّه هناك يــم راســــك فـﮔدناها
بأرض الشــــــام يبن امّي دفنّاها
وعلى اشفافك يزيد اسياطه لوّاها
دنّه راسك ابقسوه = وسوطه عليك يتلوّه
الحقد والسوط على الشفتين = خلّن بالـﮔلب نارين
اﮔـعد شوفنه اشبينه
*******
الموشـــــــــــــــــــــح
----------
اليوم اربعينك يخـــــويه واعتنيت
غصب عنّك سافرت واليوم اجيت
وعلى ﮔبرك لملمت حيلي وبـﭽيت
والعدو حيلي يخويه هدّمه
*******
جيتك بلهفـــــة مفارﮒ يالحنين
ﮔوم ليّه وشوفني خويه يحسين
وارد انشدك عن اخوتي صفوا وين
ﮔوم دلّيني يبن حامي الحمه
*******
وين همتك ها يبن داحي الباب
ﮔوم راويني خيمنه الـﮔلب ذاب
بس اشوف رماد من ذيـﭺ الاطناب
وﭽـن اشوف اعتابها متألمه
*******
وارد انشدك وين عبد الله الرضيع
صدﮒ نيمته اعله نحرك ؟لايضيع
هاي امّة جــــدّك وهـــــذا الصنيع
جازت اتعابه بسفك اطهر دمه
*******