ليش خشمك “يخر” في الجو البارد؟ يعني حتى لو ما فيك نشلة وطلعت بره وشفت الهوا بررررررررررررررد،
بتلقى خشمك يصير حنفية تصب. ليش عاد؟
الموضوع شوي راح يلوّع جبودكم عاد كيفكم 
لول
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
الله يسلمكم الخشم هذا ما شاء الله مو بس للتنفس وخلاص، هالخشم اللي معقد العالم وطايحين فيه عمليات تجميل هذا صاير مثل فلتر طبيعي سبحان الله يصفّي الهوا اللي يدش صدرك. يومياً يفرز مخاط بكمية تقارب لتر إلا شوي (,94 تقريباً ،،، حوالي أربع أكواب عالآخر ييييووووو)، هالإفرازات ترطّب وتدفّي الخشم وتنظّف الهوا اللي يعبر المجرى الأنفي بمساعدة الشعيرات الأنفية.
زين شكو في الجو البارد تزيد هالإفرازات السنسونية؟
تحت الغدد الأنفية الخاصة بإفراز هالمخاط –أو بلهجتنا الكويتية السناسين - تلقون عدد كبير من الأوعية الدموية الدقيقة، الأوعية متصلة بالغدد وتمدها بحاجتها من الدم لإنتاج هالمخاط. بس المشكلة يوم يصير الجو بارد الأوعية هذي تتوسع وتكبر…
ليش؟
لأنك بردان وخشمك وجسمك يبي يتدفّى أكثر، من جذي تلقى الدم يتدفّق أكثر بكل مكان وبالخصوص المناطق المكشوفة مثل خشمك اللطيف . حتى إذا كان البرد قارس حيل مرات تحس بدقات قلبك قوية بصدرك، هذا لأن قلبك يكون شاد حيله يبي يلحّق على ضخ الدم عشان يدفى جسمك.
المهم عاد بسبب توسّع الأوعية الدموية المتصلة بالغدد راح يتدفق الدم بكمية أكبر لها، وكلما استقبلت الغدة دم أكثر كلما اشتغلت بتصنيع السناسين أكثر وروووح! الغدد تصير مثل مطبخ سناسين مبتلش بعزيمة ومو لاحق ، يسوّي من صوب ويوزّع من صوب لووول.
بعدين هالسناسين الوايدة كثر الله خيرها تساعد على تدفئة الهوا الداخل أكثر من المعتاد، صدرك ما يتحمل ياخذ هوا وايد بارد ولازم يوفر الكمية المناسبة للطلب الزايد.
ودي أشرح أكثر شلون الخشم طول الوقت يفرز بس ما نحس فيه خارج الأنف وشلون نسبة كبيرة منه تطيح داخل البلعوم بس أخاف تلوع جبدكم يا جماعة ماله داعي. هم ودي أبيّن شلون يوم يصير الجو بارد راح نشوف الإفراز يتسلل من الأنف على استحياء بسبب عملية الإفراز الزايدة وماكو مكان داخل الخشم صار زحمة خلاص، يعني الخشم يبدي يوززّزززززعععععع على قولة معلق الجزيرة الرياضية. بس هم ما أقدر أشرح هالسالفة أخاف القرّاء الأعزة تشمئز نفوسهم بس تدش غرفة دافية وتنطر شوي راح يوقف خشمك، يوقف بمجرد استقرار درجة حرارة الأنف مع حرار الغرفة وتتقلص الأوعية وترتاح الغدد.
سبحان الله شلون خلقنا بهالصورة 
وسلامتكم
</I>