سيدة الأحلام عضو فعال
الســـــــــــــــــلام عليكم... تعتبر الدوخلــــــــــــه ..قربان لعودة الحجــــــــــاج بالسلامه الى أرض الوطن ... ومن بعض الأهازيج التي تُردد عند رمي الدوخلة أو في هذه الأيام الخاصه بشهر الحج... دوخلتي حجي بي حجي بي، لامن يجي حبيبي حبيبي، حبيبي راح مكة مكة، أو مكة المعمورة المعمورة، فيها السلاسل والذهب والنوره والنوره، حجيت بش ييمة، راويتش قبر محمد، صلوا عليه وسلم، ياليتها لومية، مزروعة في البستان، يقشرها عبد الله، وياكلها سلمان، سلمان يابو جوخة، يمراطن العجمان، طلوا خواتي طلوا، شوفوا البحر طميان، شوفوا شراع أبيي، ابيض من القرطاس، شوفوا شراع العدو أسود من الطفو، عندي طوير احمر، وأسكره بالسكر، سكر على سكر، وغضارتين صيني، يارب تهديني، وأحج بيت الله وأقرأ الفلافيني، يا ميقعة المحلب، خليني بتدحلب، بدحلب الصواني، ياسلوقة العيد العيد ودي أبيي بعيد أبعيد، أو حججية أوزورية، أو جيبيه بالسلامة، سلامة الغنامة. وفي أهزوجة أخرى تتغير بعض الكلمات فيقال «دوخلتي دوخلتي حجي بي حجي بي حجي بي، وريتها حبيبي حبيبي حبيبي، حبيبي راح لمكة لمكة لمكة، ومكة المعمورة المعمورة لمعمورة، فيها السلاسل والذهب ونوره ونوره ونوره، حجيتك يا يمه يا يمه يايمه، راويتك قبر محمد محمد محمد، اصلي عليه وسلم وسلم، مشيت أنا وراها وراها، واحسب لخطاها خطاها، خطاها حبيب رمان رمان، من رمان البديعه بديعه، زهراء وديعه وديعه». ومن أهازيج «الحية بيه» يوم رميها يردد الأطفال «حيـّه بيـّه راحـت حيـّه ويـات حيّـه، على درب الحنيـنيـه، يـا حيّتـي حيّـي بـي، بيـت مكـه دقـي بـي، أشـربي من مـاي زمزم، وادعـي لديارنـا تسلـم، حيّه بيـّه راحت حيّـه ويـات حيـّه، على درب الحنـينيـّه، وش تاكلـون لحم طيـور، وش تشربون نقطة عسل، يارب أعيادنـا دوم مّتابعـة، وفرحة عدونا في البحر طابعة، عشيتـج غديتـج نهار العيد لا دعّين عليه، مع السلامـة يا حيّتيـة أمنتج الله وابـري ذمّتيـه». وهناك نص آخر يقول «يـا حيّتــي حييّـنـاك، عشينـاك وغدّينـاك، وليـلــة العيـــد، على الرملـة رمينــاك». والبعض يقول «الله وياش ياضحيتي، الله وياش ياضحيتي، حلليني وابري دمتي، حلليني وابري دمتي». ومنهم من يقول:«مع السلامة يا ضحيتي، مع السلامة يا ضحيتي، حلليني وابري دمتي، حلليني وابري دمتي». شكرا لك على طرح الموضوع الذي يعود بنا الى أحلى الذكريات تحياتي التراثيه سيدة الآحلام