حسونة العيد

[المدّگدگ]

مساكم الله بالخير اعيــــ :عين زايغه ـــــوني


:امايي: :امايي: :امايي: مكدادوووه يبنگح....يبنگح يعني يصيح اصياح كأنه ونان اسعاف.

أم جعفر...يم جعفر....ويش عند وجه السولي هلتبنگح؟....حسه اموصل لصاباط بيت أبو شمله؟....نايبه اتهجمه على دا حس....يحگرص لمجاز كأنه اطرامب سوزكي 70 منشگه كنداسته.

انت جيت يبو جعفر...تعال لهلمگرود عسى الله يگرده....باچر العيد ولا هو راضي يتحسن....رفروفه نحيس الخلگه طايح لچتوفه صاير كأنه عدگ اخواجيه....فشلني النحيس اليوم في السموعه...الگملات يتدابو عليه...والنسوان يتطافرو عنه مايمبو يگعدو صوبه.

شوف يمنگاشوووه يلجحش....اليوم اتزهب روحك أوديك للمحسن يحسنك أحسن لأم اللي جابتك....تعال هادي مي حاله وياك....صبرنا عليك يوم وافنين, شهر وشهرين گلنا يمكن يختشي ويروح للمحسن ابروحه.....لابارك الله فيك من صنو...حتى أنا جتني حكه في بدني...والله أخاف ترستني بگملك وانا ما أدري.

:امايي: مانا متحســـــــــــــــــــــــــــــــــــــن..... .....مانا متحســــــــــــــــــــــــــــــن....امبى أحلگ....امبى......إخاف أتحسن تالي يسرٌو عليي لصبيان أگرع گرنگع طاح في الطاسه .... صرَخ على امه يمبى گرطاسه.

هههههها....هههههها.....هههههها....سلَط الله على ابليسك يمكدادووه....بس!!!!!....خايف يسرٌو عليك لصبيان؟!!!...عجل لو تسمع سالفتي يوم انا صنو مفلاتك ويش اتگول؟...

:امايي: ويش سالفتك بعد؟....انت بعد ماتمبى تتحسن منجيزي؟.....يالله انطيني سالفتك يمكن أغير رايي واروح اتحسن.

[المدّگدگ]

لا....انا بالعكس ...أنا مانا امخالف....أنا أمبى أتحسن...بس گبل لا أنطيك سالفتي خد هلمعلومه...اللول الحلاگه درجات وكل درجه ليها گيمتها, ومكاين الحلاگه تشتغل بالإيد كأنهم صباين, لأنه ماكو قهربا داك الوكت:

1. حلاگه اتواليت (گيمتها اريالين)
2. حسونه نمره 1واحد, أو افنين, أو فلافه (گيمتها اريال)
3. حسونه صفر يعني بطاطس أو بتيرس (گيمتها نص اريال)

الشاهد, داك اليوم صاير راسي رفروف مفلات راسك الحين....اخدت ويايي ولد اختي معتوگ ورحنا لأبويي گهوة الناصري و گلت له :

أبويي راسي أكبر وامبى أروح للمحسن اتحسن...مد ايده في مخباه وانطاني اريال وگال ليي روح اتحسن عند حجي منصور المحاسنه الله يرحمه
....(انطاني اريال يعني الحسونه بتصير يا نمره واحد أو افنين أوفلافه)....

ولد اختي معتوگ عكروت...گال ليي:

:حركات: لاويش يمكي ماتروح للمحسن من جابر واتخليه يحسنك بطاطا واتكد لك نص اريال؟.....

گلت أنا والله خوش فكره...واللول نص اريال شي...مو مفل الحين مايجيب لك حتى اگشم....رحت لمن جابر الله يعافيه, وشال داك الكدير من راسي....وصرت بطاطس يلمع....أنطيناه نص واخدنا نص....رحنا عند دكان عبود الصفار واشتريت ليي انا بيبسيه ومعتوگ بيرندا...واحنا مستانسي نزغد بالميل....وگرعتي تلمع اتگول غنچه صين....يوم گزرنا ردينا الديره....ما أگبلنا اللا الزفه گايمه اتگول مضاهره:

أگرع گرنگع طاح في الطاسه .... صرَخ على امه يمبى گرطاسه

زفو لگرع بلا اعگال ...... حطوه على المده وبال...

وهكذا, انطلقت المظاهره من الدروازه الشرقيه وانتهت عند مسجد ابوعزيز صوب چبرة السمچ امگابل رغيف تاروت الحين.
وتعال شوف صريخي اتگول تيس حيفه مفطوم.....عاد انا منها گلت ما أعودها ابلط على الصفر مره فانيه.

ههههههها.....هههههههها.....ههههههها....يعني ابو سوابق...وتمباني انزف مفلاتك بعد؟؟؟؟....رررررررررح..

إي ولدي حرسكم الله مع السلامه

[شروفه]

أگرع گرنگع طاح في الطاسه .... صرَخ على امه يمبى گرطاسه
ههههههههههههههه عجل لمعت القرعة عجل ياحجي مكى مسكين :)
عشان كدا مكداد مايبا يتحسن عشان لايصير مفلات أبوه ..

منتدي تاروت الثقافي
بستان الفكر والمعرفة

[رمش الغروب]

الله يعطيك الف عافيه ياحجي
وانا معجبه بك وبقصصك ومتابعتنك من اول ما دخلت انت المنتدى وعساك على القوه

بنيتك شذا الورد

[المدّگدگ]

مساكم الله بالخير اعيــــــ :عين زايغه ــــــــــــني

اقتباس: ههههههههههههههه عجل لمعت القرعة عجل ياحجي مكى مسكين

طبعن لمعت ويش علمبالش.....والمصبنه ما اكتفو بالسرايه وخلاص....إلا كل واحد جا و انطاني گريعيه على راسي حتى رمَنوه..(رمَنوه يعني صارت فيه برابگ كأنهم رمان)....عجل لويش گمت اصرخ كأني تيس حيفه مفطوم؟؟!!!

اقتباس: عشان كدا مكداد مايبا يتحسن عشان لايصير مفلات أبوه ..

لا مو عشان يصير مفلاتي....مكدادووه النحيس مايمبى يتحسن عشان شاف ولد خاله ميفموه الدلوعه حالگ كبوريا گال بيسوي منجيزه.

اقتباس: الله يعطيك الف عافيه ياحجي وانا معجبه بك وبقصصك ومتابعتنك من اول ما دخلت انت المنتدى وعساك على القوه

وانتين بعد الله ينطيش مليون عافيه يبتي يا شذا الورد....وشكرن على الإعجاب بقصصي....أرجو المتابعه....الجاي ان شا الله يعجبكم بعد.

شكرن جزيلن لمشرفتنا العزيزه شروفه و كذلك ابنتنا الغاليه شذا الورد على تفاعلهم معنا...وترقبوا الآتي من ملف ذكرياتنا


إي ولدي حرسكم الله مع السلامه

[شروفه]

ونحن معك من المترقبين :)

منتدي تاروت الثقافي
بستان الفكر والمعرفة

[رمش الغروب]

سير وحنا معاك

[عطر الغرام]

مسكين مكداوده

الله يعينه
يسلموووووو المدكدك

[زهرة الحب]

[align=center]بعد سألفتك مستحيل يرضى يقرع هههههههه..

اقتباس: الگملات يتدابو عليه...والنسوان يتطافرو عنه مايمبو يگعدو صوبه.

ضحكتني على القمل عدل..


نترقب الجديد..
وكل عام وأنت بخير..



أختـكم..
زهرة[/align]

[المدّگدگ]

مساكم الله بالخير اعيــــــــ :عين زايغه ـــــــــــوني

اقتباس: مسكين مكداوده الله يعينه يسلموووووو المدكدك

الله يسلمش يبتي يتقوى.....هذا ويش فيش بعد ابويي من زمان مانشوف لش لوده؟...عسى ماشر يبتي؟....من دخلتش في موضوع فرن علوي ّگطعتي ارجولش من دشة العشع حيفش بس الحين داشه....هوستينا عليش...اتصدّگي يبتي انا كل أحّگگ ويَ مهجاموه مكدادووه أگول يمكن هو اللي امزعلنش....أعرفه شراني النحيس....ماضل واحد في الديره اللا انطاه حگه من العضيض.....
مرحبن فلافة آلاف وفلافميه وفلافه وفلافين ببنيتنا تقوى.

اقتباس: نترقب الجديد.. وكل عام وأنت بخير..

وانتين ابخير وصحه وسلامه يبتي يزهره.....الجديد جاي عن گريب...بس انتين لا تگطعي حيتش لينا.....
حضورك أسعدني كثيرن....فأهلن و سهلن بك يازهره.

إي ولدي حرسكم الله مع السلامه

[كلش حزين]

حليوه علما اني ما كملتها لان لالون عورت عيوني

[المدّگدگ]

صبحكم الله بالخير اعيــــــــ :عين زايغه ـــــــــــوني

اقتباس: حليوه علما اني ما كملتها لان لالون عورت عيوني

حليوه وحليوه وتالي ماكملتها؟!!!...ويش الفايده عجل؟....على كلن لا تستحج...داكم يبيعو كشمات في سوگ واگف...گيمة الكشمه فلطعشر اريال مصنوعه بس حگ اگراية الكنكنوتر.........أو تدري جيب لك مصري يگرا و يكتب عنك ادا تستحج بعد اتگول الكشمه اتعور عواينك...يعني حليموه العمده مو أحسن منك غناتي....على فكره بعض المكاتب ادا اتگدم على افنين مصريين ينطوك سررنكي دعايه....يالله فرصتك گدم على أربعه وافتح لك مكتب خدمات عامه....أشوف هليام مكاتب الخدمات العامه گايم سوگها.

شكرن كفيرن ولدي كلش حزين وان شا الله انشوفك في العشه دوم مو يوم.


إي ولدي حرسكم الله مع السلامه

[عطر الغرام]

عيدك مبارك يالمدكدك

داك اليوم اسولف عنك عند ابويي علوي

اقوله واحد اللول اسمه مكي المدقدق يجيكم الفرن واسال امي بعد بنت هاشم

وماهم ذاكرينك

والله يالمدكدك محلي المنتدى بسوالفك

الله يطول لينا بعمرك ويخليك

واني ماقطعت المنتدى دايم ادخل واقراه

[باب العين]

عيدكم مبارك جميعاً وكل عام وأنتم بخير.



اقتباس من تقوى :داك اليوم اسولف عنك عند ابويي علوي

اقوله واحد اللول اسمه مكي المدقدق يجيكم الفرن واسال امي بعد بنت هاشم

وماهم ذاكرينك

هادي المرّه اسأليهم عن مكي لمدندن ههههههههه

[عطر الغرام]

هههههههههههههه

وشو لقبه الدندن يعنو؟؟؟