شدختي شدخة .

[القلم المتأمل]

بمناسبة حلول عيد الفطر السعيد أهنئكم جميعا أعاده الله علينا وعليكم باليمن والمسرات ، وبهذه المناسبة حبيت ان أشارككم البسمة من خلال بعض الظرائف ، مشاركا إخواني باب العين ، والمدقدق قصصهم التراثية الجميلة ...

القصتي المعدلة من وحي قصص لمدقدق ، وهي نفس ردي على موضوع حمارة مبلتعة بس فيها إضافات وتعديلات أخرى ..
---------------------------------------------------------------
تصدقون أنا ما أعرف أركب على لحمارة ، ولا عمري صرت أهوى ركوبها ، عاد قبل أيام لول ، ما تخلو الديرة من الحمير المنتشرة ، مثل الغنم والطاطم ولدياي والبط في اليلحات وبين الزرانيق ، عاد هذه الحيوانات متعودة عليك وأنت متعود على شوفتها ، والشيئ عادي جدا جدا ، ومنظرها مألوف أمامك ، أتشوف مثلا سرب بش ووز وبطات أم علي تنحدر من صوب التلة المرتفعة ، تبي اتروح يلحة بيت العرب ، كلها تمشي ، عاد ليش حتى تسبح يا زعم في مراغة الماي إللي تدفقه النسوان من تمطير الماي من ليفر بيت العرب لمن تغسل لثياب لو المواعين، عاد اتشوف البط يجري بسرعة عند المنحدر ، كأنها جالبوت بيت أبو رويس تتكولب على الماي ، وتزيد سرعتها أكثر وأكثر لإن ما عندها توازن ، وتضرب أبريك ، كلما أتقربت من مراغة الماي إللي كأنها بحيرة لو عين عذاري، صارت تهرول حدها حاطتنها في المية ، أتشوف وحده منسدحة لإنها متعرقلة لو وحدة أتكاكي بصوت بشع اتدعي وتشتم كاك ، ككككابشبشبش.. ( على ويش هالصوت ما تدري أصلا ، بس فاكه منقارها وتلبلب جنها نسوان متهاوشين على نشار لثياب في اليلحة .
المهم حمارة محمد عيد مرت على البشات في أشواطها على سهلة بيتهم قبل ما ينبني ، وبريدتها من السرعة الصاروخية ، ودفقت رأيها وراحت البشات والبطات تصركع وتدعي وما تسكن من هاللغوة القايمة وهالبلبلة ، وكلما لحمارة مرت عليها عويت رقبتها صوبهم ، عنفصت وأثارت الرملة ولغبار من كل صوب وهم ما عندهم إلا كككككبقبقبقبب ، ومحمد عيد أمسوي روحه بطل الفيلم على البشات جنه ( إستيف أوستن ) ( مسلسل الأبيض والأسود )
وكلما شفت أنا ولد عمتى هذا يسوقها ، ويعنفص إبها ويعطرز ، ويسوي حركات علينا ، وإحنا مدهوشين منه ومن حركاته الاستفزازية ومهاراته العالية في قيادة هذه المركبة المكوكية الصاروخية ، و قاعد بلا عدة قريب لعجوتها ، ويهمي عليها ، وهي رايح جنها زهبه أمرقه من سرعتها ، من شفته واهو يتكمزعليها رايح جاي وارجوله من تحت بطن لحماره حازمنها ، جنه في سيرك ، قلت أنا بعد أبي استعرض مفله ، أنزين أبي استعرض لكن ما في عمري ركبت لحماره .. المهم قال لي ترى يولد خالي بتشطف بك وبتعفسك ، ترى مهي هينه ـ، وأنت ما تعرف تصلب روحك عليها ،قلت إله إلا أبي أسوقها وأركبها وأعنفص أبها ، ليش أنت رزيل هالقد ، ويا طويلين العمر وقف لحمارة صوبي ، وقمت أربط أوزاري زين حتى لا يخلس ، وكلما بغيت أرفع أريولي على ظهرها قامت اتحرك عضلات جسمها وبطنها ، وصار جسمها كأنه جهاز إللي يدلك الجسم ، يهتز مثل الجلي المترطرط .. ومن ركبت عليها ، أبي أيود روحي ، أبي أمسك على رقبتها ، أبي أتصلب ، منيه ، مناك ، ما فيه فايده ، راحت بي جنها مجنونه على كبر بيت لصفر إتحك لجدار فيي ، وتطلع من صوب إل كبر،وأوزاري انتشر كأنه برشوت ـ وأحس ذنبتها تلشط ظهري بقوة ، وهي منطلقة صوب الغرب على رملة بيت عيد ، مارة بعد على البط تبي اتبريدهم ، وتبي بعد تفلتني في مراغة الماي ،، لالالا صرت ألحين في هالحالة منعوي ما أنا قادر أعدل جسمي وواسيه على ظهرها ، أشوف الأرض وأنا منعوي: فوق ، لبيوت من وراء عيوني :منظرة مقلوبة ، لصبيان إللي يركضون : يمشون على راسهم ، البط والبش :دبابين وفراشات وعصافير ، كومة الحصى عند المراغة : غيم ، والمراغة : فجة سما بين الغيم ، أما لنخيل أشوفها اتصفق بسعفها واتملوح إبها ، صرت متشلبي تحت البطن وحركات ريايلها تضرب فيي من السرعة ، تنحلس إيدي وأنا مجنوز بين بطنها ووزاري متعلبج فيي ، وصريخي ما حد يسمعه ، وإليهالوه ولصبيان وراي تركض وغبرتهم كايمه ، مهم قادرين يصيدونها، وأنا الحين ما عليي من ضحكهم وصريخهم بس أبي السلامة ، أي سلامه وأي بلاوي ، وأنا اصرخ وأنادي إلحكونييييي ، يا علي ، ياعلييييييييي ، واتباخخخخ ،وحيييييه على الأرض ورقبتي انجنزت في إسهل الرملة وصرت جني قلم ارصاص مجنوز في الأرض ، وبوزي مشحون رمل ، وعيوني مصكوكة من لدموع والغبرة ، فانيلتي اتعلقت برقبتي ، وبطني أمشمخ من أعود الشجر ، وريالي صارو أمحمسين عدل عدل ـ حتى الدم صار بلون الغبرة ، ولحمارة من شافتني جديه ما كفاها شدختني ، راحت إتزوبقني بنهكتها وأنا مجنوز ، جنها أتقول ليي إذا فيك هالمرة خوش بوش يلخرطي رد سوهها ، وفي نهاية نهكتها ، اتفر وتملوح راسها عليي واتكول : هررر ، هرررر ، وأنا أجوف أضروسها من تحت براطمها بلمقلوب تحرص عليها من الحمق عليي ، وأنا لابي إلإ هالغبرة وهالشدخة ، وهي بتحرص بعد وابتعض براطمها ، واتخرخر .. وصلت لصبيان صوبي متفتكين من الضحك ، وما شفت روحي إلا هم محلقين عليي ،ميتين وسكرانين من لتكهكه ، لا وإللي ازيد قهر وبطة جبد إن الدبش والبش بعد يبون إيشوفون نهاية مأساة بطل ، غرق في إسهل مظاعن بيت عيد ، وما يعرف يسنّع برطم حمارة عن ضحك لصبيان ، واللي ما يعرف للحمارة يشطف بعدتها ..

[شمس الأصيل]

ههههـ .. الله يقطعها هالحمارة لعبت لعب وماكفاها :كشافات:
هالقصة خلتني أضحك وأني مالي خلق أضحك..((يالله سوت فينا خيرقصتكم))
ولا.. الكلام زي الصحيح.. زي كلام أهل اللول عفر

مشكور أخوي القلم المتأمل .. وننتظر المزيد

تحياتي

شمس الأصيل
منتدى تاروت الثقافي
بستان الفكر والمعرفة

[القلم المتأمل]

اقتباس: المشاركة الأصلية كتبت بواسطة شمس الأصيل   ههههـ .. الله يقطعها هالحمارة لعبت لعب وماكفاها :كشافات: هالقصة خلتني أضحك وأني مالي خلق أضحك..((يالله سوت فينا خيرقصتكم)) ولا.. الكلام زي الصحيح.. زي كلام أهل اللول عفر مشكور أخوي القلم المتأمل .. وننتظر المزيد تحياتي شمس الأصيل منتدى تاروت الثقافي بستان الفكر والمعرفة

الحمد لله إن خلقك بدأ يتحسن مع هذه القصة يا شمس وتضحكك ، يا بوش من يصير خلقك مهو خوش عليش بهل القصص الساخرة ، فهي تجمع بين الترويح عن النفس واشياء اخرى ..
تمنياتي لك بالسعادة وزيارة علي وأولاده .

نعم الكلام زي كلام ما لول .. لا وبعد لو فيه شيئ يخلي اللهجة تتطلع جان شفتيها تموت من الضحك ..

دمتي في رعاية الله ورعايته .

[سيدة الأحلام]

أخوي القلم المتأمل /

ويش لك تتعيلف بالحمارة هذا صرت توم اسوير مو القلم المتأمل على ها لمغامرة

بس ويش معناة اليلحه؟؟!!:كشافات:

المراغة...تقصد الغيـــــــــــلة!!؟؟(الخمقه يعني)

سعدنا بمغامرتك..


تحياتي التراثية
سيدة الأحلام
منتدى تاروت الثقافي

[القلم المتأمل]

اقتباس: المشاركة الأصلية كتبت بواسطة سيدة الأحلام  أخوي القلم المتأمل / ويش لك تتعيلف بالحمارة هذا صرت توم اسوير مو القلم المتأمل على ها لمغامرة بس ويش معناة اليلحه؟؟!!:كشافات: المراغة...تقصد الغيـــــــــــلة!!؟؟(الخمقه يعني) طبيعة سعدنا بمغامرتك.. تحياتي التراثية سيدة الأحلام منتدى تاروت الثقافي

الشقاوة المتكررة ، وحب الفضول والاستطلاع هذا إللي خلاني أتعلف بلحمارة ، المشكلة حياتنا كلها بنفس الطبيعة .. يمكن لو نكتب مغامراتنا كلها يمكن تفوق أكثر من توم سوير ..

اليلحة : هي بالجيم : جلحة : أي مجموعة من النخيل وتسمى أيضا الخيس أو الخيسة ( مجموعة نخل كاغابة ) .
ولإن لهجتنا الدرازية تقلب الجيم ياء فبالتالي وضعتها كما لهجتنا المعتادة .
أما المراغة : فهي مساحة من الأرض يتجمع فيها مياه الصرف ، ويظل فترة من الزمن بفعل الاستخدام للغسيل ، ولإن ليس هناك مياه صرف أو بواليع عن ( الجلحات ) والتي بها ( جليب / جفر ) فإن المياه الغير صالحة للإستخدام مرة أخرى تظل متجمعة في هذا المحيط .
اما الخمقة : فهي الطينة التي تبقى بعد جفاف المياه ، وتكون زلقة وذات را~حة كريهة تزكم الأنوف ، وعادة تكون الخمقة سوداء نتيجة تحلل وزيادة نسبة البكتيريا الضارة .

سيدة الأحلام : سعدت بتواجدك وإثارتك لهذه الأسئلة التراثية المهمة ..
لك ألق السعادة مصحوبة بتحقيق نذرك لإم البنين .

[حروف مبعثرة]

السلآآآآم...

^_-

هههـ

اهم شي جت سليمة...

بس رغم معاناتك في ديك اللحظة لما تتذكرها الحين تحسها وناسة اكيد ..

.....

ومشكور ع توضيح الكلمات...

لأني عانيت شوي واني اقراها...بس حليوة اللهجة مررة

دووم تكتب لينا هالقصص الحلوة أخوي..


حرووف..

[أنوار الأمل]

هههههه قصتك أخي أضحكتني كثير وأمتعتني .. وتظل لأيام الطفولة شقاوة
وذكريات جميلة ولها طعم خاص كلما تذكرها الشخص ^_^ ..
والكلمات التراثية ليس لنا غنى عنها وقد أضفت على قصتك نكهة حلاوة ..
ننتظر قصص آخرى من قلمك يا أخي ^_^ ..
تحياتي معطرة ...

منتدى تاروت الثقافي
بستان الفكر والمعرفة

[القلم المتأمل]

اقتباس: المشاركة الأصلية كتبت بواسطة أنوار الأمل   هههههه قصتك أخي أضحكتني كثير وأمتعتني .. وتظل لأيام الطفولة شقاوة وذكريات جميلة ولها طعم خاص كلما تذكرها الشخص ^_^ .. والكلمات التراثية ليس لنا غنى عنها وقد أضفت على قصتك نكهة حلاوة .. ننتظر قصص آخرى من قلمك يا أخي ^_^ .. تحياتي معطرة ... منتدى تاروت الثقافي بستان الفكر والمعرفة

حياك الله وبياك ..
نعم للشقاوة حلاوة نستشعر حلاوتها الآن ، ونضحك على مواقفنا .. لا يمكن نسيانها أبدااا

لولا الكلمات التراثية لما كان لهذه القصة طعما ، فلكل موقف نكهته الخاصة ربما لا تعطي المتعة لو كتبت بشكل آخر .

تحياتي لشخصكم النبيل ،
ونتمنى المواصلة مع ألق التحايا

[القلم المتأمل]

اقتباس: المشاركة الأصلية كتبت بواسطة حروف مبعثرة   السلآآآآم... ^_- هههـ اهم شي جت سليمة... بس رغم معاناتك في ديك اللحظة لما تتذكرها الحين تحسها وناسة اكيد .. ..... ومشكور ع توضيح الكلمات... لأني عانيت شوي واني اقراها...بس حليوة اللهجة مررة دووم تكتب لينا هالقصص الحلوة أخوي.. حرووف..

ما أظن جت سليمة ، اتشذبت أريولي عدل عدل ..
أكيد يا حروف ما راح أنسى مثل هذه المواقف ..
بس كلماتنا تقريبا تشبه كلماتكم ، ولكن مصطلحات تختلف هنا ، وتتشابه هناك .

ممتن جدا جدا لحضوركم اللطيف .
أشكرك . تحياي

[باب العين]

لطيف كالعادة يبو احمد ، قصص لها رونق خاص ، أخونا الكبير كان له موقف مع حمارة بيت خالي تشبه هذه ، فهي مع ابن خالي سنعة وويش حلاتها لكن مع اخوي عداوة دين .

اذا ماعليك كلافة ابغى اشوف قصة المداقية اللا صادهم اخوك جعفر وهدهم في ميلس القراية ، هذي فعلاً تفطس من الضحك .

[القلم المتأمل]

اقتباس: المشاركة الأصلية كتبت بواسطة باب العين  لطيف كالعادة يبو احمد ، قصص لها رونق خاص ، أخونا الكبير كان له موقف مع حمارة بيت خالي تشبه هذه ، فهي مع ابن خالي سنعة وويش حلاتها لكن مع اخوي عداوة دين . اذا ماعليك كلافة ابغى اشوف قصة المداقية اللا صادهم اخوك جعفر وهدهم في ميلس القراية ، هذي فعلاً تفطس من الضحك .

هلا والله بأبي محمد .. عشت يابن الأجاويد .. كيف حالك والأهل .
ياريت اتخل هالقصة لينا مع هاالحمارة لمينونة ..

قصة أخي جغفر الدرازي مع المدقي والملا حسن ، تجده على الوصلة ألآتية :

أنا وعمي والمدقي وملا حسن العصفور
http://www.tarout.info/montada/showt...335#post134335

[باب العين]

رائعة من روائعك ، كأنها فاكهة في غير أوانها واشتهينها .

كأني معاكم ، في العزية ، أتخيل مجلسكم وكأن الزمان لم يتوقف ، رحم الله أباك وأختك .

وسلامي الأخوي للأخ الرادود المبدع جعفر الدرازي .

[14نور]

مشكووور القلم المتأمل يعطيك العافيه
يحليل سوالفك والله رجعتنا لايام سوالف
جدتي الله يرحمها ويرحم أموات المسلمين
وننتظر جديدك

[القلم المتأمل]

اقتباس: المشاركة الأصلية كتبت بواسطة 14نور  مشكووور القلم المتأمل يعطيك العافيه يحليل سوالفك والله رجعتنا لايام سوالف جدتي الله يرحمها ويرحم أموات المسلمين وننتظر جديدك

هلا والله 14 نور
ويعافيك يابنت الناس
ترى يا بوج سوالف لول ما تنمل ، بساطة ووناسة
وناس جاية تذكر سنوات شكاوتها وحلاوتها ، وكانها تودع ما قات من عمرها .. أييه يابوج ترى ما حد كفوا ينكد على جلام مال لول ، طيبه ، وسماحه ، وعفويه ..
الله يرحم جدتك وجدتي وجدتكم كلكم مع اجدودنا ..
رحمهم الله جميعا ، ورحم الله من قرأ لهم الفاتحة ..

حياك الله ورعاك

[..سر وجودي..]

[quoteوهي رايح جنها زهبه ][/quote]

هههههههه يااااااااااااو غباااااااااااار ..الصراحة مت من الضحك

ودمعت عوايني..مغامرة حلووووووووووة..

يسلموووو الانامل اللي طقطقت على الكيبوورد..