أول يوم في المدرسه

[المتدقدق]

صبحكم الله بالخير

:امايي: مكدادوه يتدحن من الصريخ....أم جعفر في إيدها ابراه اتخيط نفنوفها المنشگ...يدخل العشه أبو جعفر جاي من السموعه, سمع صريخ مكدادو ه, فدار هذا الحديث:

ويش فيه طايح الحض يبنگح من صباح الله خير....سكتيه سكتيه سكت رسه و انطفى حسه,حگرص امجازنا عسى الله يحگرص امجازه...من اخلگت إلى ألحين مااسمعت صنو يصرخ مفلاته ....اتگول خلاطة اسميت أبو يمن تشتغل....

حياة نبيك محمد ما گصرت وياه, راشيت فيه لين اعجزت...أنطيته اگريصات أبو الشكر....أنطيته ملاليس أبو البيبسي...اعلوچ تفاگ...حلاوه أبو الطابوگ....ماكو فايده...مو راضي يسكت...ايگول لك يبو جعفر لازم اتدشوه المدرسه السنه هادي....جارنا مرتضايوه مو أحسن منه...هداكو أبوه بيوديه المدرسه السنه.

والله وفگب لك ريش يمكدادوه يوجه لطوير....تمبى اتروح المدرسه؟....انوديك ولا تهتم خلف أبويي... چم مكداد احنا عاد عندنا...إيــــــــــه مرتضايوه مو أحسن منك اعيوني....لكن شوف يمكداد يولدي گبل لاانوديك, تعال خليني اباسايلك چم مسئله في الحساب أدا جاوبتهم, وديناك...وادا ما جاوبتهم, گعدتك ويَ الغنم في الزريبه أبرك لينا و لك..

مكدادوه مسح ادموعه واخترش من الفرحه...وگال:

صحيح جدي, اتودويي إدا أجاوب؟.

أيـــــــــه أنوديك والله ما أچدب....هاك السؤال: واحد زايد واحد يساوي چم؟

واحد زايد واحد يساوي فلافه.

فلافه أمك يانحيس....واحد زايد واحد چم؟ ....يالله همش گول.

واحد زايد واحد يساوي أربعه.

لا إلا خوش ...چان واحد زايد واحد يساوي أربعه ...كديناها وياك يوجه الطبشور...ويمبى يروح المدرسه بعد....تعالي يم جعفر شوفي لش حل وياه هلمطيور.

مكداد خلف أمي خليك وياي...اسمع...اعيون واعيون چم يصيرو؟

اعيون واعيون يصيرو...ايصيرو...ايييه ايصيرو اعيونين.

وأدون وأدون چم يصيرو؟

أدون وأدون يجدتي يصيرو......أدونين.

شاطر مكداد...عجل خلاص: واحد زايد واحد چم يصيرو؟

مكدادوه يفكر اشوي وهو يحك في راسه....

واحد زايد واحد يساوي.... واحد زايد واحد يساوي..... واحد زايد واحد يساوي....أيييه عرفت ....واحد زايد واحد يساوي واحدين...صح ديده؟....مانا گولي صح عشان اتودونــــــــــي.

ههههههها....هههههههها....ههههههها ....واحد زايد واحد يساوي واحدين....والله كتلتني من الضحك يمكدادوه....مانا گادر على سواياك....لا ....أنا يتراوى ليي گعدتك في الزريبه وي لصخال أبرك لك يوجه الخروف....فوگ هادا بنوديك و أمرنا لله.

انزين و انت الحينگاعد تتطنز عليي, اللا يسمعك ألحين مره كبير الدخاتره...لكن تعال جدي انت تضكر أول يوم لك في المدرسه؟....فيوين كانت مدرستكم و منهو اللي وداك و ويش سويت؟

أضكر...اشلون ما أضكر.....أول يوم يدخلوني المدرسه, كان هذا مطلع الستينات في القرن الماضي, أبويي وكتها في الغوص بعده ما يرد, هو كان المفؤوض يجي في نفس اليوم, مدري ويش اللي أخره....وأخويي الكبير يشتغل في مطار الضهران اللي كنسلوه ولا يجي إلا كل فلافة اشهر مسوى مافيه سيايير واجد ديك لسنين منجيز ألحين, عشان چديه, أمي الله يرحمها وصت جارنا عبد علي و كان هو في الرابع يتحمل بي و يحودني من إيدي.... مدرستنا كانت في نخل الغالي, المكان وحش بعيد عن الديره و على طريگ المگبره.

بس خد هلمعلومه اللي ماتعرفها عني أول:....أنا أمي من جابتني سمتني (عبد الأمير), مسوى جابوني ليلة عيد الغدير...اكبرت وانتشيت وانا ما حد يعرفني إلا عبد الأمير...ادا بغو مني حاجه أگضيها ليهم, زعگو عليي: تعال يأموري (يدلعوني يعني)....لكن ادا بغيت أنا من عندهم لو أگل الدون هجولوني و گالو (انگلع يأميروه)....ترى إلى ألحين بعض الشياب ما يسموني إلا عبد الأمير...و لو اتگول ليهم حجي مكي ماحد يعرفني.....وفي حاجه فانيه بعد, أنا كنت أغلط, السين أگلبها ثين, والصاد أگولها ثاد....عجزت و يايي جدتي الله يرحمها وهي اتعلمني چان أنطگها صحيح, ما فاد.

الشاهد أبويي الله يرحمه ويرحم شيعة أمير المؤمنين, گبل لا تفتح المدرسه ابشهر و نص, راح إلى مكتب التوابع في الگطيف عشان يسجل اسمي في تابعيته ومنها يسجلني في المدرسه نوبه وحده....وگف في الطابور و داك الطابور اموصل للطريگ....انهاريه و هو واگف في داك الطابور لزين و صل لدريشة الكيتبي, أنطاه الملف, أخد الكيتبي الملف, سحب شهادة الميلاد منه و گعد يبحلگ :عين زايغهفيها (كان أحول ), گرا الإسم (عبد الأمير) وتزيد حوالته ... وگعد يصايح: عبد الأمير؟؟؟!!!... شنهو دا هلإسم؟!...(كأنه مو عاجبنه....أيه عبد الأمير والأمير عدوهم وعدو جدهم معاويه)...يحجي هادا الإسم ممنوع ولازم اتغيره و رمى الملف في وجهه ابن الـ....(وكمل انت بين القوسين)......أبويي الله يرحمه رد عليه وهو مغلوب على أمره: انت تامر طال عمرك...تمباني أغيره ماكو مانع, ألحين أغيره....اكتب عندك: "مكي سلمان المدگدگ"...گال له الكيتبي و هو مستانس (اتگول امحرر القدس الحين هوه) : ايه شفت الحين إش زينه (مكي), مو (عبد الأمير)....جا أبويي لا گال لأمي....ولا لجدتي....و لا أنا و لا لواحد في البيت انه غير اسمي من عبد الأمير إلى مكي.

الوهگه ألحين في المدرسه....طبعن انتون تعرفو أول يوم ايصفو الطلاب طابور في ساحة المدرسه ويگعدو يزعگو على أساميهم واحد واحد, واللي يطلع أسمه يروح على فصله....زعگو على كل الأولاد و طلعو أساميهم إلا أنا....الأستاد باح حسه و هوه يصايح....مكي سلمان المدگدگ...وأنا ساكت....مكي سلمان المدگدگ وانا أبدن ما كأني أسمع....خيرته اعجز وراح, النحيس حتى ما اتأتى يسايلني عن اسمي......ضليت في الساحه لابروحي ماحد وياي, جتني الغبنه, كلهم راحو على افصولهم إلا أنا...إلاويش مايمبوني....لايكون أنا سويت شي وأنا ما أدري عن روحي وخافو أوصخهم (جاهل و أسويها)...شيكت على روحي, كل شي ماكو, نضيف وامزگرت...لا!!!...زادت الغبنه في صدري وأهد لك داك الصريخ اللي فزع المدرسه تفزيع, اتگول صفارة الإندار يا دافع البلا....جا المدير وجا الوكيل والمدرسين يتراكضو ايشوفو ويش صاير, لايكون هاجمه اسرائيل علينا.

من شافوني أصرخ استنكرو حتى واحد منهم گعد يگول: بل بل بل!!!!....كل هالصريخ طالع من بوز هلطوير؟!!!!...ايسايلوني ويش اسمك بابا؟!!... أگول ليهم وأنا أنافت من الصريخ: ع ..ع...ع عبد الأ... أ... أ... أمير... ث... ث...ثلمان المد...د...د..دگدگ....المدير طبعن ما عرف و يش أنا گلت...زعگ على الفراش حسن الطويل عشان يترجم له....عود الفراش يسايلني عن اسمي و أنا بعدني أنافت, گلت له: ع...ع عبد الأ... أ... أ... أمير... ث... ث...ثلمان المد...د...د..دگدگ....الفراش عرف وگال للمدير هادا اسمه عبد الأمير سلمان المدگدگ طال عمرك....خلينا أنشوف دفتر الكشوفات يمكن اسمه موجود لو لا..... گعدو يدوروعلى إسمي انهاريه و ما لگوه.

المدير أنطى الفراش رخصه عشان يوديني البيت...ومن المدرسه للبيت و أنا صريخياموصل لدروازة الديره الغربيه و المخاخيط متدلدله, وعاد امي الله يرحمها امسبحتني و اممشطه راسي (فرگ على الموده), كل تعبتها راحت بلاش....وصلت البيت وشافتني جدتي الله يرحمها وادموعي تخرط أربع أربع...اتگول لي, ويش فيك يأميروه اتبنگح, منهو اللي ضاربنك عفر؟...گلت ليها: يديده (يجدتي يعني), كل لثبيان طلعو أثاميهم و دخلو افثولهم إلا أنا....وفي واحد بعد اثمه مكي ثلمان المدگدگ هادا ذعگو على اثمه لذين عجذو, يتراوى ليي غايب....إلا بدخلة ابوي حيفه راد من الغوص, وهو يسمع حچينا...وگعد يناخر من الضحك عليي وگال ليي: يولدي أنت مكي سلمان المدگدگ.....أنا غيرت اسمك في دفتر التوابع من عبد الأمير إلى مكي بس ما مداني أگول ليكم, الوكت كان امضايگ على دشتنا الغوص.

أنا من اسمعت چـديه طمرت طمره لو اشوي دعم راسي سگف العشه من الفرح كأني قردة الطيرزان.....يعني مكيوه اللي يذعگو عليه هو أنا!!!!...مابغيتها إلا هي واسحب وياي ابوي ركيض على المدرسه حتى انعالي الزنوبه انگص...ودخلنا على المدير وعلمه بالسالفه...وضحك المدير ضحك للحين ما أنساه...فچ حنچه كأنه اطبيلة سياره...وانا من داك الصوب امچندس راسي فرحان متشگـــــــگ من الفرح...وگلت ابصوط منخفض: ايه ما يثير جارنا ثادقوه ايودوه المدرثه وأنا ما يودوني.


حرسكم الله مع السلامه

[Alia]

ياغناتي تجنن وانت صغير هههههههههه
مع المدرثه
ضحكت ضحك لحد ماشبعت هههههههه
اول شي بسأل
مقداد مو ولدك
لانه يقول الك جدي
يعني ولد ولدك هذا اللي فهمته
مكي يصير جد مقداد

في مواقف ضحكت منها بقوة
خصوصا لما ودوك المدرسة وانت مسكين لحالك
واتغبنت وقعدت اتصيح ولما شيكت على حالك انك وسخت او لا ههههههه


بل!!!!....كل هالصريخ طالع من بوز هلطوير؟!! " عجبتني هذي " خخخخ


ومن المدرسه للبيت و أنا صريخياموصل لدروازة الديره الغربيه و المخاخيط متدلدله, وعاد امي الله يرحمها امسبحتني و اممشطه راسي (فرگ على الموده), كل تعبتها راحت بلاش
" أتخيل بس الموقف بخيالي خخخخخخخ"

كل لثبيان طلعو أثاميهم و دخلو افثولهم إلا أنا " هذي تجنن فيها هههه ودي امقع خدودك "

ايه ما يثير جارنا ثادقوه ايودوه المدرثه وأنا ما يودوني

يعطيك الف عافيه عمي مقداد
ولاتحرمن هالقصص الي تروح عن النفس وتوسع الصدر
نترقب جديدك مكي ثلمان :حركات:

[ام الحليو]

الله يغربلك ياالمتدقدق.اكتشفناك ابو سوالف من صغرك
خليتنا ندحن من الضحك اني واولادي.الحين عذروني على الضحك الي اكركره..............حلوه اكركره.
خلينا نرجع الى سالفتك قلت لي امك مسويه لك فرق او مدهنتنك
لايكون مزبطه شعرك بعطر الشاه هدا عجل انت كشخه عطر الشاه الى الحين موجود في الصيدليات. وكل سنه يزيد سعره
مثكووووووووووووووور اخوي على هالموضوع المزبط.
تقبل تحيات
اختك ام الحليو

[أنوار الأمل]

أما سالفتك من حق تضحك :ضحكتني::ضحكتني: يا علي تدحن من الضحك ..
عجل كان اسمك عبد الأمير بعدين غيروه << حلو مكي عفر
والله زين تذكر سالفتك بأول يوم بالمدرسة أما أني لو تسألني
ويش أكلت اليوم بقول لك نسيت ^_^ ..
أمتعتنا وأستأنسنا بالقراءة .. ننتظر سوالفك القادمة << طماعة
تحياتي عطرة ..

منتدى تاروت الثقافي
بستان الفكر والمعرفة

[المتدقدق]

اقتباس: المشاركة الأصلية كتبت بواسطة ريحانة  ياغناتي تجنن وانت صغير هههههههههه مع المدرثه ضحكت ضحك لحد ماشبعت هههههههه اول شي بسأل مقداد مو ولدك لانه يقول الك جدي يعني ولد ولدك هذا اللي فهمته مكي يصير جد مقداد في مواقف ضحكت منها بقوة خصوصا لما ودوك المدرسة وانت مسكين لحالك واتغبنت وقعدت اتصيح ولما شيكت على حالك انك وسخت او لا ههههههه بل!!!!....كل هالصريخ طالع من بوز هلطوير؟!! " عجبتني هذي " خخخخ ومن المدرسه للبيت و أنا صريخياموصل لدروازة الديره الغربيه و المخاخيط متدلدله, وعاد امي الله يرحمها امسبحتني و اممشطه راسي (فرگ على الموده), كل تعبتها راحت بلاش " أتخيل بس الموقف بخيالي خخخخخخخ" كل لثبيان طلعو أثاميهم و دخلو افثولهم إلا أنا " هذي تجنن فيها هههه ودي امقع خدودك " ايه ما يثير جارنا ثادقوه ايودوه المدرثه وأنا ما يودوني يعطيك الف عافيه عمي مقداد ولاتحرمن هالقصص الي تروح عن النفس وتوسع الصدر نترقب جديدك مكي ثلمان :حركات:

أول شي باجاوبش, نعم, مكدادوه ولد ولدي جعفر يعني أنا جده...من أول ما فطموه لليوم و هو املازمنا مو راضي يفارگنا.......و ادا يوم سوى بلاسه و گلنا خلاص اليوم آخر يوم لك ويانا, تعالي شوفي صريخه, دينمه تشتغل...ما يسكت إلا ليمن انطيب خاطره...يريحانه يختي ضكرتيني بالعبوده أختي إدا جيت من المدرسه تستلمني وهات يمسايل, ها مكي ويش عطوك اليوم في المدرسه؟...أرد عليها: أنطونا, د ر ث...د ر ث...ذ ر غ...ذ ر غ, و ذ ن...و ذ ن, هي من تسمعني, دركال تمگع اخدودي و هي اتگول اباكلك على خفافة هالطينه...و اروح ركيض ابصريخي لأمي أشتكي...أمي عاد اتطيب خاطري و اتگول: هادي من زود امحبتها لك يمكي....وانتين بعد الله يعطيش فلافة آلاف عافيه و لا يحرمنا من طلتكم البهيه...و أتمنى الجاي يكون أحلى.

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة ام الحليو  الله يغربلك ياالمتدقدق.اكتشفناك ابو سوالف من صغرك

اقتباس: المشاركة الأصلية كتبت بواسطة ام الحليو  خليتنا ندحن من الضحك اني واولادي.الحين عذروني على الضحك الي اكركره..............حلوه اكركره. خلينا نرجع الى سالفتك قلت لي امك مسويه لك فرق او مدهنتنك لايكون مزبطه شعرك بعطر الشاه هدا عجل انت كشخه عطر الشاه الى الحين موجود في الصيدليات. وكل سنه يزيد سعره مثكووووووووووووووور اخوي على هالموضوع المزبط. تقبل تحيات اختك ام الحليو

هلمره يختي أم الحليو جبنا ليكم سالفه ما أنضرب فيها...بس الصراحه يمبالش تتخيلي حال المدرسه گبل أربعين سنه...مدرسه وحده شايله اصبيان تاروت, ربيعيه, فريگ الأطرش, الخارجيه, الدباس, أرض الجبل و الديره...صحيح المدرسه كبيره, بس مافيها قهرب....و لاكو باصات و لاماكروات منجيز الحين...و يوم اللي يطيح المطر تعالي شوفي حالتنا, مداحينا لحلوگنا...الصراحه يم الحليو, كانت الوالده امزبطه راسي بدهن الكوفرا, عطر الشاه ما أشتهيه, يعبل الراس النحيس...و تقبلي فائق احتراماتي و لا تنسي اتسلمي على الأولاد و لا اتخليهم يضحكو واجد.

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة أنوار الأمل   أما سالفتك من حق تضحك :ضحكتني::ضحكتني: يا علي تدحن من الضحك .. عجل كان اسمك عبد الأمير بعدين غيروه << حلو مكي عفر والله زين تذكر سالفتك بأول يوم بالمدرسة أما أني لو تسألني ويش أكلت اليوم بقول لك نسيت ^_^ .. أمتعتنا وأستأنسنا بالقراءة .. ننتظر سوالفك القادمة << طماعة تحياتي عطرة .. منتدى تاروت الثقافي بستان الفكر والمعرفة

طبعن اسم مكي حلو, على إسم أختي مكيه, مسوى أبويي يحبها واجد, سماني على إسمها....طبعن أضكر...أضكر كان فصلنا اسمه أولى جيم....و أضكر اسم الأستاد و أسم العريف و اسامي الأولاد اللي وياي في الفصل...أضكر كان ويانا و لد دختور (فلسطيني اسمه يوسف), ما عجبه المدرس, كله يصرخ, بس عاد ما يغلبني في الصريخ....حولوه على فصل دال, كمل سنته و من يومها ما شفته, سايلت عنه, گالو انتقلو لأبو ضبي...و أضكر منهو اللي نجح و منهو اللي رسب و منهو اللي طلع من أول شهر بعد...انتضرو الجاي, قد يكون شعر شعبي هلمره أتمنى يعجبكم...ولك مثل التحيه و أحسن منها.

حرسكم الله مع السلامه

[عسوله]

رجعتنا بالذاكره لوره لأول يوم مناحه يوم أمي تركتني وراحت البيت بعد ماثلمتني للمدرثه كَتلت روحي كَتال من الثريخ. أخواني كانوا في مدرثة الغالي مفلك. أضحك الله ثنك كما أضحكتنا.

[شمس الأصيل]

الله يقطع بليسك يالمتدقدق..

حزازيك مررة جخة.. وتفطس من الضحك

وتشرح القلب..


تحياتي

شمس الأصيل
منتدى تاروت الثقافي
بستان الفكر والمعرفة

[لؤلؤة الحياة]

ههههههههه
والله فاطسة من الضحك
يسلموو المتدقدق على الموضوع
وكثر من هالمواضيع

[المتدقدق]

مساكم الله بالخير

اقتباس: المشاركة الأصلية كتبت بواسطة عسوله  رجعتنا بالذاكره لوره لأول يوم مناحه يوم أمي تركتني وراحت البيت بعد ماثلمتني للمدرثه كَتلت روحي كَتال من الثريخ. أخواني كانوا في مدرثة الغالي مفلك. أضحك الله ثنك كما أضحكتنا.

مره واحد رجع بذاكرته, صدم اللي وراه (ادري نكته بايخه).....يعثوله في فرگ بين ثريخي و ثريخش....انتين ثريخش تمبي أمش, و انا ثريخي أمبى أدخل الفثل....بث ما أضن كان ثريخش مفل ثريخي...ثريخي أنا هدرگ المدرثه....ندعو لك بالعافيه و طول العمر و النجاح و الفلاح في هالدنيا كما دعيتي لنا...

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة شمس الأصيل  الله يقطع بليسك يالمتدقدق..

اقتباس: المشاركة الأصلية كتبت بواسطة شمس الأصيل   حزازيك مررة جخة.. وتفطس من الضحك وتشرح القلب.. تحياتي شمس الأصيل منتدى تاروت الثقافي بستان الفكر والمعرفة

شرح الله صدرك للإيمان و طاعة الرحمن يشمس الأصيل يبت حجي سلمان....نصيحه لش يبتي يشمس, اياني و ياش تگري حزازينا و انتين على شبع...ادا بغيتي تگري ممبعد الأكل بساعتين...ترى الضحك على شبع مو زين, يسوي نفخ في المعده و حاروگ...صحيح ترى مو هرجه....تحياتي التراثيه للأخت شمس الأصيل.

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة لؤلؤة الحياة  ههههههههه

اقتباس: المشاركة الأصلية كتبت بواسطة لؤلؤة الحياة  والله فاطسة من الضحك يسلموو المتدقدق على الموضوع وكثر من هالمواضيع

امصدگنش يبتي لولوه من غير حلفان...و الدليل, دشيتي العشه الترافيه حتى ما گلتي شحوالش يم جعفر....شحوالك يبو جعفر....شحوالك يمكدادوه يلجرفلي....دركال دشيتي بتبهبگش (بتبهبگش = بضحكش)...يسلمووو لؤلؤة الحياة و ان شا الله با كفر من هلمواضيع, بس انتين بعد كفري دشتش لينا العشه الترافيه..

حرسكم الله مع السلامه

[حروف مبعثرة]

السلام..

هـ هـ هـ

اول يوم قصصه قصص..

بس وين قصصكم قبل أحلى و وناسة..

تحياتي لك..

اختكم.. حروف..

[ماذا لو؟]

الله يحفظك يالمتدقدق

حزاياتك تشرح الخاطر والنفس وربي !
شفت إذا انت مزكم وتحط فكس؟ تخيل ((الهم = زكام ))و ((سوالفك = الفكس)) << الله من زين التشبيه!!

سؤال يقرقع بمخي .. قصصك واقعية فعلاً وإلا من نسج خيالك حسب الأحداث القديمة اللي عشتها.. يعني صارت لك أنت شخصياً وإلا جمعت ذكريات الماضي ولبستها شخصية مقداد والباقي لجل تسوي بهالقصص؟

الله يحفظك و يخليك