أكاديمية الوعود الزائفة

[eve]

أكاديمية التعلم الكندية
مرحباً بكم في أكاديمية التخلف :
هذه الأكاديمية التي تذهب موظفاتها لطالبات الثانوية وتقول إن الأكاديمية لديها شهادات معتمده من وزارة التربيه والتعليم وإن بإمكان الطالبات إكمال دراستهن في الجامعات الحكومية وأيضاً توجد وظائف مضمونه..
طبعاً يوجد تخصصات منها:
تأهيل معلمات, شبكات,ادارة اعمال,سكرتاريه,برمجة,مساعدة ادارية
وكل دبلوم له سعره الخاص فأنا طالبة تأهل كان المبلغ 19 الف ريال من غير المواصلات وغير ان حفل التخرج كان لها رسوم 150 ريال ودورة معارف بـ 250 ريال يعني( السالفه ومافيها اخذ فلوس وبس) ..
بدأنا الدراسة وكنا ندرس مواد غير الموجوده في الخطه الدراسية وهنا بداية النزاع بين الطالبات والادارة طبعا الادارة ماعندها أي حل غير اكتبوا خطاب واكتبوا فيه أسمائكم وتواقيعكم و ما فيه فايدة
طبعا أول دفعه تخرجت كان حفلة التخرج في الأندلس وكانت توجد شركات للتقديم واعتقد تم قبول البعض نسبة قليلة جداً والباقي في المنزل ..
الدفعة الثانيه ألا وهي دفعتي فكانت حفلة التخرج في السيف في الخبر وبوجود الأميرة وسلمتنا شهادات تخرج وهي مجرد ورقة لا أكثر ولا يوجد فيها حتى أسمائنا وبعدها تخرجنا واستلمنا وثيقة لكن بدون ختم لا وزارة ولا مؤسسة يعني أنا مثلاً نجحت بمعدل A+ ولكن شهادة غير معتمدة ..طبعاً أنا طموحي أن أكمل دراستي وآخذ البكلريوس وقالت لي المديرة اني اقدر أكمل دراستي في جامعه الفيصل وإذا ماقبلوني أكلمها ... وبالفعل كلمت جامعه الفيصل وبمجرد أن قلت للعميد ابو أحمد إني خريجة الاكاديمية قال لي إن الشهادة غير مقبولة في جميع الجامعات عدا العربيه المفتوحة ...بعدها كلمت مديرة الأكاديمية الأستاذة هناء وقلت لها إني كلمت الفيصل وماقبلوني ..قال لي أكيد علشان الشهادة مو مصدقة مافيها ختم قلت لها لا يا استاذه ماسألني عن ختم ولا مصدقة أو لا ..بس قلت له الاكاديمية قال لي مو مقبولة سجلي من جديد بشهادة الثانوية وادرسي من البداية ..وكلمتهم بنفسها وقالوا لها نفس الكلام وردت علي ..
بالعربي ياناس الاكاديمة تاخذ فلوس على الفاضي .. لاوظايف ولا تكملة دراسة وكلامهم كله كذب في كذب
إحنا انصدنا وانخدعنا بكلامهم وحبيت انشر الموضوع علشان لا أحد ينصاد ويطيح في نفس الفخ
ولازلت بلا شهادة
وبإنتظار إختبار المؤسسة ويقال انه بكون في شهر جمادى الثاني يعني في الاجازة
مدري يلعبوا على مين هم والاختبار في مواد غير اللي درسناها .. هل يعقل؟!
وطبعاً الامتحان مؤجل كان المفروض بعد عيد الحج

تقبلو تحيااتي
eve