عيشة گبل-ج2

[المتدقدق]

صبحكم الله بالخير

استوت الگهوه....مكدادوه حاط الشيبنه اللا يصب الگهوه هو عن أمه العوده أم جعفر....حمل الدله و الفناجيل و جاك يصب الگهوه لأبو جابر و جده أبو جعفر...صب الفنجال لأبوجابر, هو من حس حرارة الفنجال, رماه من إيده و دركال على بنطرون أبو جابر...ويطمر أبو جابر من على الكرفايه وهو يصارخ:
(أححححح....اسسس....أححححح....أسسسس.....ححححح)...سل ط الله على ابليسك يمحماسوه يمكدادوه, ويش سويت فينا؟...الله يغربلك غربال.

مكدادوه جمد محله مسكين فشلان...و گام له أبو جعفر يمبى يضربه...گال له أبو جابر:

لا يبو جعفر لا تضربه, هادا اللا بعده جاهل ما يفتهم

جت أم جعفر و أنطت مكدادووه غيضه خلته يگعد ينصنص, و دارت لأبو جابر تتسامح منه و گالت له:

افصخ بنطرونك يبو جابر, ألحين أغسله و ايبسه و أضربه أوتي

أخد ابو جابر على أخدها و فصخ بنطرونه و گعد بالكوت و القميص و هافامريكي أبو چكچك....و كمل أبو جعفر نشيدته:

تضكر يبوجابر بعد: لعب ومرح فوگ الگصر...وكت الصبابيح والعصر

اصناوه كنا امشولعين...لاهم ولاغم شايلين...في الدَبه دوم متعلِگين...كأنَا بلابيل فوگ سدر

حمدوه يصيح عبدوه تعال...عيسوه يصيح جمعوه تعال...اشوي ولااتشوف اللا داك الصاباط متروس بالجهال

كلنا تجمعنا ابعجل...والكل يسايل ياترى شلِي جرى؟...شلِي حصل؟

جارنا سعيدوه مخترش...عاطنه عمه چم گرش
گال النا عاد بسكم گريض...وعلى الگصر يالله ركيض

گبل لا تستوي الزحمه..بلمصبنه واللعب يحمى..ترى ماحد عنده رحمه

اللي مايگبض مكانه... گعدته عالترب تمسي...او بيگعد على انعال

نگعد فلاف او ست فرگ...انطير طيايير من ورگ...يشبهو العوده ام التنگ

بس مختلف هدا الطراز...بخيوط مغروزين غراز...يريدون هوا مايريدو گاز...وامبرگشين حمر وخضُر

خيط ابو گبَه وعود حطب...انطيرها عالي طيب غصب...ولو مانتلها ماتطب

جاسم فرح و صدره انشرح...طياره گرطاس من لمح...ومن مكانه مابرح...
يصرخ ابصوتن معتلي ..ياللعجب..ياللعجب

واللي اشحلاتها الدوخله...عيسوه اخويي امسوي له

گوطي فاصوليا أوگوطي جام...امگضگض كما المشخال تمام...بخيوط يعلگه او بسيام...يتطمطم سماد وفوگه بذر

من العانه الماي يسگي...ومن دموع العين يروي...ولزمن الشمس فوگه تضوي

يمكن ليله يمكن اربع...والزرع تالي ايتشعشع

ويفرح عوَاسوه واخته...لأن زرعهم طال نبته...ويفرح و اياهم نصر..

تضكر يبو جابر؟!!!!....و الله ما ضنتي تنسى.

أبو جابر گام يبنگح...

حرسكم الله مع السلامه

[)( smile )(]

كلامك ماينمل يا متدقدق

اقتباس: تضكر يبو جابر؟!!!!....و الله ما ضنتي تنسى. أبو جابر گام يبنگح...

مو بس ابو جابر اتضكر
حتى اني ضكرت الزرانيق و الحوي
ونطلع على الباب العصاري نلعب مخطه وصيده

تسلم حجي مكي وسلم على ام الجهال

[عسوله]

حجي مكي ذكرياتكم حليوه زي ذكرياتنا ولعبنا في الطريق قريب باب البيت إيه لبنيات ولصبيان. مخطه وكنيس و سوالف قبل أذان المغرب وتالي انصلي ونروح عين العوده رحمها الله. قواك الله على هالسالفه.

[ام الحليو]

الله عليك ياأخوي
ابحار رائع ........الدوخله كانت امي الله يحفظها تسويها الينا وبعدين اتودينا عين العوده ونرميها في العوينه.
بس ماأدري ليش ماأتكررت عدة مرات .يمكن الناس تركو ا هالعاده او أن امي أتمللت .الله اعلم بس المهم ان اني أستمتعت بالدوخله.
على فكره اخوي الشعر صحيح اخلي الواحد انصنص اتنصنص هههههههههه
اني اسمي الماضي الزمن الجميل.الذي لن يتكرر ثانية. اسمح لي هداره عفر بس الموضوع اخلي الواحد يهدر هدره
ننتظر المزيد من روائع الماضي
تحيات اختك ام الحليو

[المتدقدق]

مساكم الله بالخير

اقتباس: المشاركة الأصلية كتبت بواسطة )( smile )(   كلامك ماينمل يا متدقدق مو بس ابو جابر اتضكر حتى اني ضكرت الزرانيق و الحوي ونطلع على الباب العصاري نلعب مخطه وصيده تسلم حجي مكي وسلم على ام الجهال

أكيد يختي يا ابتسام الكلام عن اللول و أهل اللول و عيشة اللول ما ينمل منها...صحيح انتين ضكرتي مفل أبو جابر. بس ما صحتي مفله...أبو جابر صريخه وصل لأرض الجبل, و ادموعه تخرط أربع أربع...و اتگولي ضكرتي الزرانيگ و الحوي و لعبة المخطه؟...أي وحده فيهم عاد؟...المخطه التاروتيه و اللا الگطيفيه؟...

ويش رايش اختي ابتسام اتحطي موضوع عن ألعاب أول...حطي الموضوع و ان شا الله بنتجاوب وياش....أشكرك أختي العزيزه على التواصل و السلام وصل أم الجهال و هي بعد اتسلم عليش.

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة عسوله  حجي مكي ذكرياتكم حليوه زي ذكرياتنا ولعبنا في الطريق قريب باب البيت إيه لبنيات ولصبيان. مخطه وكنيس و سوالف قبل أذان المغرب وتالي انصلي ونروح عين العوده رحمها الله. قواك الله على هالسالفه.

الله يحلي أيامش يختي يعسوله...للأسف الأيام الحلوه دائما قصيره, و عمرها من عمر الزهور...أيام كلها صفاء و موده و وئام...نجد الأولاد مع البنات مع بعضهم في لعبهم, في لهوهم, في براءتهم, في رواحهم, في غدوهم, حتى في تعلمهم للٌقرآن عند المعلم, تجديهم مع بعض...في اللعب, (لعبة الحجيرات مثلا), البنات لا يتقبلن الهزيمه بسهوله,و اذا ا نهزمت الواحده منهن, تضل تبكي يومها كله, و تأتي يوم ثاني و كلها عزيمه على الفوز...و كذلك في تعلم القرآن, نراهن حريصات على المجيء و المغادره على الوقت, مثابرات في إنهاء الدرس المقرر عليهن بصوره صحيحه..و هكذا...

أشكرك أختي عسوله على التواصل و ترقبينا في الادم من المشاركات.

حرسكم الله مع السلامه

[المتدقدق]

مساكم الله بالخير

اقتباس: المشاركة الأصلية كتبت بواسطة ام الحليو  الله عليك ياأخوي

اقتباس: المشاركة الأصلية كتبت بواسطة ام الحليو  ابحار رائع ........الدوخله كانت امي الله يحفظها تسويها الينا وبعدين اتودينا عين العوده ونرميها في العوينه. بس ماأدري ليش ماأتكررت عدة مرات .يمكن الناس تركو ا هالعاده او أن امي أتمللت .الله اعلم بس المهم ان اني أستمتعت بالدوخله. على فكره اخوي الشعر صحيح اخلي الواحد انصنص اتنصنص هههههههههه اني اسمي الماضي الزمن الجميل.الذي لن يتكرر ثانية. اسمح لي هداره عفر بس الموضوع اخلي الواحد يهدر هدره ننتظر المزيد من روائع الماضي تحيات اختك ام الحليو

اهلن و سهلن بالأخت العزيزه أم الحليو....تأخرت في الرد فأرجو المعذره, مشاكل الإتصال الله يحلها ان شا الله...

الله يحفض لش الوالده و يحفضش ليها...بالنسبه للدوخله يختي, أنا گلت انسويها بگواطي فاصوليا أو گواطي جام, بس في دواخل تتسوى من خوص النخيل, هادا النوع أحسن من الگوطي بأضعاف المرات, و لكن بسبب بطأ العمل فيها, نضطر لعملها من الگواطي لسرعة التنفيذ...جدير ذكره, في هذه الأيام, تبتدئ رحلة الدوخله, فيشرع العمل فيها, و من ثم إسمادها و إبذارها و سقيها من ماء الجداول الجاريه حول الديره و السواد الأعظم من الأحياء المحيطه بها. (هناك أهزوجه تردد أثناء السقي, قد نوردها أثناء الردود)...بعدها يبدأ النبات بالنمو و يضل تحت الرعايه حتى يوم العيد الأكبر, عندها, كلن يأخذ دوخلته متجها بها للعوينه لرميها فيها...العوينه هذه كانت في الأصل عين عميقه جدا و نظيفه إلا أنها أصغر من العين العوده بكثير...اندمرت العوينه بسبب الإهمال و كثرة الدواخل المحذوفه فيها.

أختي أم الحليو, الهدره عن الماضي شي طيب و لو تگعدي منيه للصبح ما نستمل...خساره يختي, الذاكره بدت اتشيخ و الخوف يجينا يوم ما يضل منها شي...بدورنا نشكر و نقدر المسؤولين عن هذا الصرح الثقافي إتاحتهم الفرصة لنا بتفريغ ما تبقى من ذكريات لا زالت ذاكرتنا تحتفظ بها...انتظري جديدنا أختي العزيزه, فلا يزال في الجعبة شي....أشكر تواصلك و لك فائق التحيات.

حرسكم الله مع السلامه

[Alia]

حليوه ايام زمان
ياريت لحقت عليهم
بس في بعض الكلمات ماعرفتهم
لو بس توضحهم لي عمي متدقدق

[أنوار الأمل]

الله على عيشة قبل كلها جميلة .. بس عفر ما لحقت على سالفة الدوخلة
>> يمكن لأن ما جربت أسوي لي وحده في تلك الفترة ..
تشكرات عمو المتدقدق على قصصك التي تنثرها لنا بين الفينة والآخرى
فتبعد عنا الهم لبعض الوقت حينما نقرآها ونبحر مع ذكرياتها الرائعة ..
ما زلنا نتابع وإن إبتعدنا وتأخرنا في المشاركة ..
تحياتي القلبية ..

منتدى تاروت الثقافي
بستان الفكر والمعرفة

[المتدقدق]

صبحكم الله بالخير

اقتباس: المشاركة الأصلية كتبت بواسطة ريحانة  حليوه ايام زمان

اقتباس: المشاركة الأصلية كتبت بواسطة ريحانة  ياريت لحقت عليهم بس في بعض الكلمات ماعرفتهم لو بس توضحهم لي عمي متدقدق

أجدد التحيه للأخت العزيزه ريحانه و أشكرها على تواصلها معنا...ريحانه انتين اتآمرين سأقوم بشرح الكلمات التي أظن أنها صعبه, و إذا لم يكن ذلك كافيا, أرجو إخطاري بذلك...

الشيبنه: من الشبان, و الشبان هو الإلتصاق بالشيئ و لكن معناها هنا الإصرار و الإلحاح في طلب الشيئ أو عمله

دركال: على طول, فورا.

أبو چكچك: أبو طقطق

الدَبه : أحد أبراج قلعة تاروت الشهيره

سدر: جمع سدره و هي شجرة الكنار أو الحرنكش عند أخواننا المصريين

الصاباط: الزقاق أو الطريق المسقوف...الموجود منه في ديرة تاروت, حي القلعه في القطيف قديما, حي الجميمه بالعواميه, حي الديره في صفوى...ألخ

گريض: ثرثره, هدره

المصبنه: الصبيان

العوده ام التنگ: المقصود بها الطائره الحقيقيه.

گاز: كيروسين

خيط ابو گبَه: الگبَه يعني الكوور و هي جسم اسطواني الشكل مصنوع من الخشب ارتفاعه 10 سم و قطره 5 سم تقريبا, و تستخدم الگبَه في الخياطه...

امگضگض: مثقب

سيام: جمع سيم و السيم سلك حديدي مرن (من الحديد المطاوع القابل للثني)

يتطمطم: يمتلئ

العانه: مكان واسع نوعا ما تتجمع فيه المياه الجاريه التي مصدرها العين العوده...العانه تخصص لغسل الأواني و الملابس حيث أن وصول المياه داخل البيوت و قتها كان أمرا مستعصيا.

أتمنى أنني وفقت لشرح الكلمات الغريبه..أكرر شكري للأخت ريحانه على تواصلها.

حرسكم الله مع السلامه

[المتدقدق]

صبحكم الله بالخير

اقتباس: المشاركة الأصلية كتبت بواسطة أنوار الأمل   الله على عيشة قبل كلها جميلة .. بس عفر ما لحقت على سالفة الدوخلة >> يمكن لأن ما جربت أسوي لي وحده في تلك الفترة .. تشكرات عمو المتدقدق على قصصك التي تنثرها لنا بين الفينة والآخرى فتبعد عنا الهم لبعض الوقت حينما نقرآها ونبحر مع ذكرياتها الرائعة .. ما زلنا نتابع وإن إبتعدنا وتأخرنا في المشاركة .. تحياتي القلبية .. منتدى تاروت الثقافي بستان الفكر والمعرفة

أجدد التحيه و الشكر لمشرفتنا القديره أنوار الأمل على تواصلها معنا...اختي أنوار لا تزال الفرصه مواتيه كي تقومي بعمل الدوخله و إبذارها و سقيها و من ثم رميها في سيف سنابس في يوم مهرجان الدوخله أو يوم العيد الأكبر و لا تنسي تلبسي لش بخنگ مطرز بالزري, و بذلك تكوني لحقتي على سالفة الدوخله...الشكر لكم أنتم أيضا على قراءة ما أنثره و الإستمتاع به...كم تمنيت أختي العزيزه أن تكون لدي موهبة الرسم كي أرسم لوحات عن خياة الزمن الماضي بكل أطيافها الجميله...الحمد لله على نعمة الذاكره, و لكن هذا لا يكفي, لأنه لابد لها من الفناء.

أكرر شكري الجزيل لك أختي العزيزه, و ترقبي القادم إن شاء الله, أتمنى يعجبكم.

حرسكم الله مع السلامه

[البتول النوراء]

تونس والله يا المتدقدق

اتذكر الاول نسوي دواخل ونروح نرميها في البحر

عاد ديك السنه اني احسن دوخله صارت من دون اخواني

حليوه في قوطي القهوه السوده

عاد رحنا رميناهم ما خلينا عظم الا وحطيناها فيها

عاد يوم رميناها
اخوي غافلني واخذها عاد ويوم وصلنا ما شتها الا وصلت البيت قبلي واني انصفعت

ويش جيبها قلت اكيد ما راح عن اخوي

وقمت اصيح قتلت حالي من الصياح

ومن ديك السنه ما سوينا دواخل

ان شاء الله االسنه اسوي للجهال

يسلمووووووووووووووووو يا ابوي العود المتدقدق

واتحفنا بها الروائع من قصص الجميله والطريفه

وننتظر التكمله

[المتدقدق]

صبحكم الله بالخير

اقتباس: المشاركة الأصلية كتبت بواسطة البتول النوراء  تونس والله يا المتدقدق اتذكر الاول نسوي دواخل ونروح نرميها في البحر عاد ديك السنه اني احسن دوخله صارت من دون اخواني حليوه في قوطي القهوه السوده عاد رحنا رميناهم ما خلينا عظم الا وحطيناها فيها عاد يوم رميناها اخوي غافلني واخذها عاد ويوم وصلنا ما شتها الا وصلت البيت قبلي واني انصفعت ويش جيبها قلت اكيد ما راح عن اخوي وقمت اصيح قتلت حالي من الصياح ومن ديك السنه ما سوينا دواخل ان شاء الله االسنه اسوي للجهال يسلمووووووووووووووووو يا ابوي العود المتدقدق واتحفنا بها الروائع من قصص الجميله والطريفه وننتظر التكمله

يا سبحان الله, نفس اللي صار لش صار ليي و لأختي اللي أصغر مني شواخ...عاد هادي إدا صرخت اتغطي على صوط دينمة بيت جارنا أبو باگي ابصريخها مسوى احنا ما عندنا دينمه...و ما تسكت اللا لمن يركبها أبويي على احمارته...يدور ابها على الحوامي و فريگ أبو ابراه و باشلامه لزين تنعس يرد ابها البيت و ينيمها...عاد تالي يدور ليي يحجني حجان...

ايوه يختي يبتول سوى الدوخله للجهال الله يحفضهم لش ويحفضش ليهم... ارسمي البهجه و الفرح على محياهم و زي ما گال المفل: "من فرح جاهل فرح نبي".

أشكرك كثيرن أختي بتول على هالتواصل و ترقبي جديدنا القديم.

حرسكم الله مع السلامه

[umali]

عزيزنا التدقدق الله يعطيك الصحه والعافيه وطولة العمر يارب ياكريم,موبس أبوجابر نصنص أحنا بعد أتحسرنا معاه على أيام قبل أيام الدشه والديره ولمعلمه والدوخله أعتقد أمي كانت تسويها لينا في قوطي قهوة ماكسويل هاوس وزي ماقالت أختي نرميها في العوينه

أتذكر مره أغرقت في العين وماحد أنتبه ليه وظليت أغفاص لحد ماطلعت

[المتدقدق]

صبحكم الله بالخير

اقتباس: المشاركة الأصلية كتبت بواسطة umali  عزيزنا التدقدق الله يعطيك الصحه والعافيه وطولة العمر يارب ياكريم,موبس أبوجابر نصنص أحنا بعد أتحسرنا معاه على أيام قبل أيام الدشه والديره ولمعلمه والدوخله أعتقد أمي كانت تسويها لينا في قوطي قهوة ماكسويل هاوس وزي ماقالت أختي نرميها في العوينه أتذكر مره أغرقت في العين وماحد أنتبه ليه وظليت أغفاص لحد ماطلعت

هدا وين هلغبه يم علي؟...صار لش فمانية أيام ابلياليهم ما طبيتي العشه؟...عسى ماشر, هوستينا عليش...يم علي, الله يجزي شباب سنابس كل خير, رجعو لينا هادي العاده اللي اندفرت...فرصتش اتسوي دوخله لعلاوي واتوديه المهرجان يوم العيد عشان يسكت عن الصريخ...ترى تسواتها بصيطه مي صعبه...اخدي لش گوطي عرانص و گضگيه زي المشخال و علگيه ابسيم و تالي حطي فيه رمل و سماد مال حمام و اشوية شعير و اسگيه كل يوم...بعدش لاحگه الشعير مايمبى له شي يفگب ابسرعه.

أشكر تواجد معنا أختنا العزيزه أم علي و لا حرمنا مشاركاتكم الطيبه


حرسكم الله مع السلامه