باب العين والملاله

[القرمبع]

بسم الله

باب العين والملاله

كانو أهل لول ايحطون الأكل في الملاله على شان لاياكله السنور أو الفار ويحمونه من الدواب…

وعلى طاري الملاله أجيب ليكم قصة باب العين وجدته …

مره من المرات وقبل سنين مضت … كانت جدة باب العين أم أبوه الله يرحمها جايه من السموعه وكانت جايبه وياها بطيخه وكنت أنا وباب العين گاعدين في الحوش يعني الحوي … دار النقاش التالي بين باب العين وجدته …

باب العين – ويش جايبه جدتي ؟؟

الجده – جايبه نحاسة اعيونك ويش تمبا ؟؟ لاويش تسأل ؟؟ وهادا منوه لصبي اللي وياك ؟؟

باب العين – هادا الگرمبع ولد المتگلهز … بس ما گلتي ليي جدتي ويش جايبه ؟؟

الجده – هادي بطيخه جايبتنها من بيت خالك وهداني باعلقها في الملاله وإياني وياك اتدانيها !!!

باب العين – انزين جدتي لا اتخافي .

طلعت الجده منيه وگام باب العين وتشلبا على الملاله وصارت تتصابا به يعني تتمرجح … ومن سوء حظه انگص لحبال اللي امعلگه فيه الملاله … وجاك باب العين على وراه … طاح على لعزيزو … وصار ايون ويطلع أصوات غريبه … ابصراحه أنا من شفت المنظر …

باب العين طايح ويون والبطيخه انبطت على راسه والغدا اتنفر على الأرض ابصراحه انحشت وخليته .

يوم فاني شفته يمشي ابلوريب يعني على كتر يعني مايل چنه سياره منكسر اسبندلها … ما يمشي عدل … ودار بيني وبينه هاالحديف :

القرمبع– هاه يباب العين ويش فيك تخنع يعين تعرج ؟؟

باب العين – اتسوي روحك ما تدري يعني ؟؟

القرمبع – ابصراحه أنا من شفتك مرمي چنك خروف مدبوح والبطيخه حولك والغدا امنفر على راسك وعلى الأرض خفت وشردت

باب العين – تدري ويش صار بعدها ياالگرمبع ؟؟

اللقرمبع – لا والله ما أدري أگول لك أنا انحشت من شفت حالتك .

باب العين – من شدة الحطمه على الأرض قمت أسحب روحي سحاب مانا گادر أوگف صابتني تبهيته … وشوي الا ابجيت أبويي والضاهر كان عازم خالي أبو علي ويوم شافني أزحف ولوني مصفر … على طول جا ليي وگال :

أبو باب العين – ويش فيك ياولدي يباب العين ويش صابك ؟؟

باب العين – گالت ليي جدتي جيب البطيخه من فوگ الملاله ويوم اتشلبيت على الملاله انگص الحبل وطحت على ورايي .

أبو باب العين – تستاهل يا باطل على هاالفعله خسرتنا العدا ياوكيح .

ومن القهر طاح في ولده دست أخو الموت وطرده بنچ حرارة الشمس من دون غدا …

ومن ديك الطيحه الغبرا الا يومك وباب العين ايعاني من البواسير وألم في العصعص يعني لعزيزو يعني آخر منطقه في الظهر .

الى اللقاء في قصه أخرى

القرمبع

[روبيرتو كارلوس]

هههههههههههههههه
وانت يالقرمبع ماوراك الا باب العين
كل المواضيع باب العين و...... الله يجازيكم ثنيناتكم

[القرمبع]

بسم الله

أخويي روبرتو كارلوس ويش أخبار البرازيل هااليومين ... بمباك تحترف في فريق لجويز داكم امسوين فريق جديد ويش رايك .

أما باب العين مارايح أعوفه وراه وراه

القرمبع:ملاكمه:

[الصراط المستقيم]

بسمه تعالى

السلام عليكم

الاخ المبدع القرمبع تحياتي لك على هذه النفسية الاريحية

الاخ باب العين كان الله في عونك على هذا المؤمن وإن كنت شخصياً أغبطكما على هذا الانسجام المثالي في جميع جوانبه حيث أنكما ولا أبالغ أن قلت أنكما تضربان مثلاً للسعادة التي هي طريق الى زرع الحب للناس والطريق الواضح بنهجكما الراشد والهادئ

لذلك أحببت الاشارة لهذا حتى يكون تقيمنا الى هذه الروح المعطاة ليس فقط للضحك إنما يكمن وراء هذه الروح المرحة تجسيد الروح الاخوية في قالب مملوء بالمودة والتراحم

والسلام

[الوردي]

هلا بالشباب الحلوين ...

الحقيقه سالفة باب العين هذي سالفة .. بس ليش ماكملت السالفه يالقرمبع ..

لكن انا باكملها عنه لأني كنت جارهم ...

وكنت اطالعهم من الدريشه .... وشفت باب العين يطيح على المحجر ..

وسمعت صوته وهو يون وشفت غبار القرمبع وهو يشرد ....

المهم هذا يا ولاد الحلال اذا رحنا بيت باب العين انا والقرمبع نسوي

هل الملالة الي سمعتوا عنها مرجحانه ونتمرجح عليها فنينا مرة وحدة

لكن باب العين ما يقدر يمترجح عليها تدروا ليش ....؟؟؟

لأنه دبه ... منتفخ .....

وعلشان جديه الملالة تقصصت يوم ركب عليها ...

يا لله اخليكم الحين ... علشان بروح العب تيل ... مع السلامة ..

الي يبغاني يجي لي في الساباط زين ..

مع تحياتي ..

الوردي ..

[طيف]

كيف حالك يالقرمبع أنشاء الله بخير ومسكين بياب العين وشفيك يالقرمبع عليه بس والله سالفة حليوة يالله جيب لينا سالفة غيرها يالله باااااااااي
مع تحياتي طيف:) :)

[باب العين]

حسبي الله عليك يا القرمبع ، أنا بس امبى أعرف من وين تجيب السوالف هدي ، والله ما أضن الا انها صارت لك ومن يومها وانت قرمبع. متقرطع.

يا الله هات ما عندك تى مستانسين الربع . الله يونسه اكفر واكفر عساك تطيح من نخلة فحال وانت رايح تبوق طلع ، وادا طحت وتقرطعت ، وين نوديك نمغطك وحمام باشا راح وراحت ايامه.