القصــــه حقيقيه 100% والضحيــــه (الساذجه) اهي اللي كتبــــت قصتها بنفســـــــها
انا سميت القصــه ثمن عمري لان فيها تشابــه
ولان الضحيه راح عمرهــا والحين تدفـــع الثمن
راح اعــرض القصــه مثل ما وصلــــت لي وهو من مصدر موثوق جدا جدا
عسى الله ينتقم لي منك وياخذ حقي من عيونك وان شاء الله يا رب تبعد كل البنات عن هالدرب الوصخ
وما توري اي بنت الويل اللي شفته بحياتي يارب
,كنت بنيه محترمه ولا كل البنات، امشي سيده ما عندي يمين ويسار، كنت دينه بس ديانتي كانت بقلبي ,لاني ما كنت متحجبه وكنت اخذ راحتي باللبس بس طبعا مو زياده عن اللزوم يعني كان لبسي بطريقه تتناسب مع مجتمعي بشكل عام،كنت متفوقه بدراستي والله كان موفقني بحياتي لين صار اللي صار وياليته ما صار، في اول ايام دخولي الجامعه كنت مستانسه ومنبهره من التغير الكبير بين الثانويه والجامعه، اشكال يديده ملابس يديده اسلوب يديد واختلاط يديد،كل شي كان بالنسبه لي مثير،كنت امشي وانا مرتاحه البال من ناحية ثقة اهلي، لان اهلي عارفيني عدل وعارفين اني مو من النوع اللي التفت حق اصبي، بس هذا طبعا ما يمنع خوفهم علي وخاصة ابوي اللي كان وايد يغار علي من عيون الناس لاني كنت البنت الوحيدة عنده ،كان لي شكل مميز وحضور قوي بكل مكان اتواجد
فيه بسبب ملامحي الناعمه الحلوه وطبعي المرح،وكنت راضيه بوضعي وعاجبني والحمدلله
في محاضراتي لاحظت وايد شباب يلتفتون علي ويبتسمون ابتسامات مالها داعي،بس كنت دايما اصد بويوهم علشان ما اعطيهم المجال انهم يتجرأون ويكلموني،بس كان في شاب فيه شي غريب، غير عن باجي الشباب،
شكله مميز، كان وسيم احلاهم، طويل واسمر ويهه ناضج بصوره خشنه رجوليه حلوه،ووايد بنات يتمنونه،كان هذا الشاب يبتسم ابتسامه لها مغزى وفيها تلميح،بس في صوت من داخلي قال لي تجاهليه اهو مثل كل الشباب ،فصديت عنه وما عطيته اي اهتمام، وهالشي طبعا كان يديد عليه لانه من احلى شباب الكليه
اللي كل البنات يمشون ويبتسمون له. تكررت نفس الحركه
خاصة وان هذا الشاب كان معاي في اغلب موادي التمهيديه. في يوم من ايام الشتا طلعت من الكليه وانا متضايقه بسبب خلاف صار بيني وبين وحده من اعز صديقاتي،
ركبت سيارتي وشغلتها ومشيت والدموع اربع اربع لدرجه اني ما كنت اشوف الطريج جدامي وماادري اشلون قاعده اسوق
مره وحده ما حسيت الا بذيج الصدمـــه القويــــه اللي طقت راسي بالجامه، وصار بعد الصدمه هدوء وانا حاطه ايدي على راسي والدم يسيح ما كنت مستوعبه شي، الصدمه صدمتين صدمه صديقتي وصدمة السياره،
مخي كان كأنه مو راضي يستوعب اللي صار، شوي والا باب سيارتي تبطل،وكان قاعد ايطق مطر والشاب نفسه وسيم الكليه واقف يطالعني وهو منصدم والمطر تلف ملابسه وشعره ، لما شاف اني تأذيت من الحادث سكر بابي وراح ركب من الباب الثاني يمي، وبدى يتأسف مع اني انا الغلطانه ولزم علي انه ياخذني بنفسه المستشفى علشان يتطمن علي، كان مؤدب لأقصى حد ويعرف الاصول والواجب
عجبتني
شهامته ورجولته واسلوبه وطريقته في الكلام وبعد ما رحنا المستشفى وعالجو الجرح اللي براسي طلب رقمي علشان يصلح سيارتي بس طبعا انا عطيته رقم ابوي وقلت له يتفاهم معاه اهو لان الغلط كان علي انا مو اهو، وعطاني رقمه بحسن نيه للضروره. من عقب الحادث حسيت اني معجبه فيــه بقوه، كنت دايما اتذكر موقفه معاي، وكل ما اشوفه في المحاضرات ارد له ابتسامته بس بدون مبالغه ، وفي يوم من الايام كان عندنا محاضره مهمه وتغيب اهو عنها، حسيت ان في شي ناقصني،شي كان عندي وفقدته،شي ضايقني، ولما رجعت البيت فكرت اسأل عنه من باب الواجب،ومسكت الرقم اللي عطاني اياه يوم الحادث، ظليت تقريبا اكثر من نص ساعه وانا متردده وماسكه سماعة التيليفون،افكر اتصل والا ما اتصل؟...اتصلت وياليتني ما اتصلت،رد علي صوته القوي العميق اللي ما تنساه اي بنت لو تسمعه،ولما عرفني حسيت انه استانس من كلامي وقام يلخبط بالحجي كأنه متوتر، وانا قلبي طار من الفرحه وكنت بنفس الوقت ارجف،سألت عنه وتطمنت عليه وعرضت عليه اني
اعطيه اهم الملاحظات اللي انشرحت في المحاضره اللي فاتته.. من ذاك اليوم وظلينا على اتصال،ما نقدر ايمر يوم بدون ما انكلم بعض،كان كلامنا مقتصر على المحاظرات والدروس والكليه والشغل،ما تجرأ احد منا وتدخل في خصوصيات الثاني،وعجبني احترامه لخصوصياتي وكبر بعيني... شديت حيلي بالمذاكره، ونتايجي كانت تبشر بالخير، كل هذا علشان اكبر بعينه ويحسب لي الف حساب، حتى اهلي لاحظوا اني متغيره، واني صرت اغني واضحك باستمرار وهذا على غير عادتي.. مره وانا اكلمه بالموبايل، قال لي انه وده يشوفني بمكان بروحنا، لانه ناوي يكلمني بموضوع مهم وخطير، اقترحت عليه اشوفه بمكان عام، لكنه رفض وبعصبيه، وقال لي انه ما يبي احد يشوفني معاه و تتأذى سمعتي، وقتها كنت راح ابشي لما سمعت كلامه، اتفقنا على اني اشوفه في سيارته في مواقف الكليه وسيارته كانت مظلله يعني محد بيقدر يشوفنا، ظليت يومها طول الليل افكر بالموضوع المهم اللي يبيني فيه، وافكاري قامت توديني وتييبني التقينا في سيارته، وبدى كلامه واهو يتلعثم ومتوتر وشكله مستحي مني، وصارحني بانه حبني من كل قلبه،ومن اول يوم شافني فيه، وانه ناوي يتزوجني، الدنيا ما شالتني من الفرحه حسيت ان قلبي بيوقف من الوناسه، نزلت راسي وماعرفت شقول له، وعلى طول بادرني وقال انه مزهب لي مفاجأه مزهبها ليوم الخطبه، وانا من فرحتي وافقت وانا منزله راسي،ما حسيت بنواياه الاصليه.
وصلنا عند عماره راقيه، في البدايه تخوفت من الفكره، لاني ولا مره بحياتي طلعت مع شاب غريب فما عرفت اشلون اتصرف، وخفت من اني اكون بروحي وياه، لكنه باسلوبه الحلو وكلامه المعسول وكلمة
(زوجة المستقبل)
اللي رددها على مسمعي، صرت مثل المنومه مغناطيسيا، ونزلت معاه دخلت الشقه وكانت رووووعه
،شي فوق الخيال، موقعها استراتيجي، والاثاث كلاسيكي ،كانت شقه ولا في الاحلام تحلم فيها كل عروسه،ابتسم لي وقال لي :اخذي راحتج وشوفيها هذا بيتج ان شاء الله عن قريب وابيج تعطيني رايج و بكل صراحه في كل غرفه وبكل قطعه اثاث،لان رايج يهمني، وقفت في الصاله اتأملها وانا مو مصدقه نفسي خفت اكون بحلم،احلى حلم، دخلت غرفة الطعام وكانت مثاليه والطاوله تتلامع من النظافه، والمطبخ كان منسق بشكل مريح ، التفت عليه وقلت له :الشقه روووعه وما اتوقع اني بشوف احلى منها، قال لي بخبث
ما حسيت فيه وقتها:ما شفتي غرفة النوم اهي احلى غرفه في الشقه كلها، تغير لوني واصطبغ بحمرة الخجل ،دفعني بحنان حق الغرفه علشان اشوفها، وكانت فعلا احلى غرفة في الشقه وقفت بوسطها اتأملها الفراش الكبير كأنه فراش ملكي والستاير الحريريه والديكورات الفخمه، كل شي كان فوق الخيال، بس لفت نظري بوسط كل هالروائع شي، كان في حبال فوق السرير، التفت وسالته عن الحبال، قام وفصخ جاكيته، وضحك ضحكه عمري ما انساها ضحكه خبيثه ضحكه طلع من وراها ويههه الاصلي ، ضحكة ذيب
، قال: هذي لج يا عمري هديه مقدما، ودفعني على السرير وانا من الصدمه حسيت اني انشليت جزئيا، ربطني النذل بسرير الاحلام وانتزع شرفي بالاكراه، ولما خلص من فعلته قعدت انووح وابجي على حالي، قام يهديني ويوعدني بانه راح يصلح غلطه وطلب مني انتظره فتره حتى يقدر ايقول لأهله ويضبط الوضع.. تدهورت حالتي الصحيه والنفسيه، وبدى ويهي يبهت ويصير شاحب ، نقصت عدة كيلوات من وزني وصرت نحيفه بشكل غير صحي،وتخلفت عن وايد محاضرات أدت الى رسوبي،انعزلت عن الكل بغرفتي، ابشي على حالي ابشي على سذاجتي اللي ودتني بداهيه، ابشي على عذريتي اللي ضاعت، ابشي على ثقه اهلي، ابشي على الدنيا اللي كانت حلوه وبلحظه صارت مره ، ابشي لين حسيت ان الدموع نشفت من عيوني... فكرت بطريقه اتخلص فيها من هذا العذاب المتواصل، ما لقيت غير اني اهدده بالمخفر علشان ينفذ وعده ويتقدم لي ، اتصلت فيه وهددته، ضحك وقال:يا عمري انتي كنت رهان بيني وبين ربعي وانا كسبته، اذا
بتهدديني بالمخفر انا اقدر اهددج بسمعتج،عصبت حيل وقلت له ان محد راح ايصدقه لان الكل يعرفني و يعرف اخلاقي، ضحك مره ثانيه وقال: انا عندي الدليل بالصوت والصوره تبين تشوفينه؟ ما عندي مانع مريني بالشقه وشوفي الدليل بعيونج،رحت له الشقه علشان اتأكد بنفسي، ولاني حسيت ان ما عندي شي اخسره، خسرت كل شي ما بقى لي شي،وبالفعل شغل لي شريط فيه كل اللي صار بينا في ذاك اليوم المشؤوم
ريلي ما شالتني، وطحت غشيانه،لما قمت سمعت اصوات ضحك، اكثر من شخص، قمت ولقيت نفسي عاريه، تفاجأت
وقمت بسرعه الملم تناتيف ملابسي اللي كانت مشققه حوالي، ومجموعة شباب يضحكون علي ويتغامزون، قام النذل (وسيم الكليه) من بينهم وقرب ناحيتي، صرخت عليه وانا ابشي، قال لي: اتصدقين بديت احبج؟ كسبتيني فوق الخمسميه دينار من الرهان بس للأسف انتي الحين مو ملكي،انتي ملك ربعي، صرخت وقلت له اني ملك نفسي واني عمري ما راح اكون ملك لاي شخص نذل وقذر وحيوان،تقدم واحد من ربعه صوبي واهو ماسك الشريط وقال: شكلج ما تبين سمعتج، وضحك وردو ضحكته الباجي، حسيت وقتها ان الدنيا سوده
بعيوني، وان مالي امل بهالدنيا....انطردت من الجامعه، وصرت مثل الاداه اللي تشبع غرائز هالاذياب البشريه، وفقدت الاحساس، فقدت مستقبلي وحتى اهلي فقدتهم، اطردوني من البيت بعد ما طاح الشريط بايدولد عمي، وصرت بين الموسمات العاهرات من مقر رذيله الى مقر رذيله، ومن شقه ليمن شقه، وحاصروا بيوم من الايام المباحث احد الشقق اللي
كانو ياخذوني لها، وانحذفت بالسجن اللي عمري ما شفته الا بالافلام ضاع مستقبلي وعمري وشبابي وكرامتي واهلي، ضاع مني كل شي وما بقى لي شي،
مافي جدامي غير ربي ما ضاع مني، ومدام خيط الامل موجود ورحمة الله واسعه،
عمري ما راح اضيع مثل ما كل شي ضاع
ان شاء الله تستفيدون من القصـــه وتاخذون منها
شويــــة عبـــره وعظـــه
18-12-02, 11:09 PM
:)
العرض العادي
المواضيع المتشابهه