ألغاز وحزاوي أهل لول

[ذو الفقار]

عندي چم لغز من ألغاز أهل لول ما أدري تعرفوا حلها يا شباب هالزمن لو لا ؟

شوفوا أنا با حطها وباشوف ردكم ويش اتقولوا .

اسئلوا أمكم لو أبوكم لو أي واحد من الكبار يعلموكم ويش حل هاللغز ترا هم يستانسوا إذا سالتوهم ، لأنكم اضكروهم بأيام اللول .

هذي الألغاز واعطوني الحل :

1- أسود مسيويد واقف على الباب يترزق الله .

2- شجرة شجنجرة رقاطها إمية وعشرة .

3- أخضر في السوق أحمر في أمك .

روحوا اسئلوا واطقسوا وتعالوا ليي باچر .

الله وياكم

[أم حُسين]

اني ماعرفت حل الا واحد بس وهو رقم 3.

الحنة مو ؟؟

[أم حُسين]

دبة خضرة و داخلها عبيد و الحكم حكم الله و مفتاحها حديد....





ما هي ؟؟

[ذو الفقار]

جوابش صحيح يا ريمي ولكن نمبا الجواب عن الفنين الباقيين

واللغز اللي قلتيه جوابه الجحة

يا الله يا شباب ننتظر جوابكم

راوونا همتكم

[باب العين]

عزيزي ذو الفقار أهلا بك تراثيا في حينا حي التراث .

غطاويك سهلة يا عزيزي.

أسود مسيويد : المگلة

شجرة شجنجرة : الفلفل

وريمي جاوب على أخضر في السوگ صح

أنا جاوبت ولا سايلت أحد ، بس انت لو سايلتك ما بتجاوب الا ادا سايلت أمك أو ابوك ويمكن ما يعرفوا !



ويشو : سبعة عبيد متراكبين أمك

[القرمبع]

بسم الله

ولدي ذو الفقار وخر عني اشوي لا تبغزني ابفقارك اسمك ايخوف ابصراحه بس احليو

ترى يولدي غطاويك وايد سهله ترى انته في التراثيه يعني اللي حولك كلهم امگدرين لازم اتيب ليهم غطاوي صعبه ... لاايكون انته توك شباب ومغششتنك يدك

الگرمبع :eek:

[ذو الفقار]

يا باب العين انت من الضباع اللي ينسالوا مو من شباب هالايام ، انت وصلصائيل المفروض يسالوكم موتنسألوا .

هالموضوع هالصغير لحگ الشباب .

هدا باب العين جاوب على اللألغاز وطرح لغز وبصراحة أنا ما أعرف حله يالله من يجيب لينا الحل .

وأخوي القرمبع غطاويي اللي اعرفها كانت من الغطاوي المشهورة أيام زمان أما اللحين يمكن تعرفها أنت ويا واحد والا افنين وإذا زادت ما يتعدوا أصابع إيدك .

ومرادي من جيبانها اهنيه أن يعرفها الجميع وتنتشر زي ما كانت منتشرة ديك السنين .

ألحين إحنا انحارس حل لغز أبونا باب العين اللي يقول فيه :

ويشو : سبعة عبيد متراكبين أمك

إذا أحد مر عليه يجاوب

[صلصائيل]

سلام على المؤمنين جميعا



يا خوك يا باب العين اشوي اشوي على وليدنا الفقار ما فيه شده اتحول عليه نوبتن وحده چديه ...... داكو مسكين من سبعة عبيد انحاش موليه .


ذو الفقار اخ وغالي وموالي وخوش موالي.


لغزك يا باب العين بصيط وهو(: العچايف مالت راس المره)

حيف الأول النسوان يسوو ليهم عچايف ونخيلات اللي يسموه هاليام اوكافير ما ادري اكو فير ..... ويش دراني انا هادا اللي اتروح المره من لضهر ولا اتعود الا ليمن غابت الشمس ابيهات والصلاة يخلوها ليوم فاني عن احساب تتعدل ولا اتجي الا هيه اتقول ادعينوه يعني مفلات السنوره الله يدفع عنا البلا والنوايب ابحق فلال الكتايب وسهم الله الصايب.


ما علينا الحين انا عندي غطو وما اشوف الشاطر اللي يعرفه اما باب العين والقرمبع بيعرفوه بس احنا نمبا غيرهم دسمع الغطو:


(( گبتن خضره وداخلها عبيد ...... الحكم حكم الله ومفتاحها حديد. ))



يالله فكرو فيه اشوي علشان تعرفوه.








أسأل الله الهداية والثبات على الولاية

[ذو الفقار]

رحم الله والديك يا صلصائيل

أنا گلت أنها العچايف لكن گلت ويش معنى سبعة ماكنت أدري أن المسوان اللول ما يسووا إلا سبع .

ما علينا

نرجع لموضوعنا

اللغز اللي جبته يا صلصائيل جابته من گبل اختنا ريمي وگلنا الحل وهو الجحة والمفتاح الحديد هو السچين والعبيد هم الحب ( الرقي) اللي داخلها .

صحيح لو مو صحيح

دخدوا هاللغز :

چاك كما چاك كما چكچكت الغزلان كما حنت كما رنت كما السلطان جالس ؟

بنحارس ويش اتقولوا

[ذو الفقار]

ويش اعجزتوا لو بعدتكم اتفكروا ؟؟؟

انشاء الله ما تكونوا مليتوا منا بس ؟؟؟؟


إذا عجزتوا قولوا ؟؟؟؟

[ذو الفقار]

الظاهر الجماعة عجزوا !!!!!


وينك يا صلصائيل ، ويا باب العين ، ويالقرمبع ؟؟؟؟

حلوه ليهم بعد ويه ,,,

أشوف طولوا ، وماجابوا حل .

باقي ليهم اليوم يوم الجمعة يمكن ايروحوا إلى امهم العودة ويسألوها
ويجيبوا الحل ....

ويوم السبت إذا ماحد جابه إنشاء الله بنحط الحل .

[ذو الفقار]

حل اللغز السابق والذي يقول : چاك كما چاك كما چكچكت الغزلان كما حنت كما رنت كما السلطان جالس ؟

هو : نعال القبقاب ( الحذاء)


أم اللغز الجديد فهو : جيته ولا جاني في السوق لاقاني ، واعمامته خضرة ، وثوبه خريساني .
فما هو ؟


نحارس أجوبتكم يا حبايبنا

إذا اصعب قولوا مو ما اجاوبوا وتتركوه زي اللي قبله

زين لو مو زين

[كريكشون]

انا عندي لغز اتحداكم تحلوه كلكم

1 - ماهو الشي الذي أذا حطيت أيدك فيه شفطك وفيه منه 110 و 220
2 . ماهو الشي الذي اذا أنت نظرك ضعيف يحطو لك فوق عواينك قزاز ويش يسموه

[ذو الفقار]

هلا والله بأخونا اكريكشون أشوف تارك الرياضة وجاي هنيه ، مافيه مباريات عفر هالأيام .

ولا جاي اتكركش في كل منتدى .

ويش هالألغاز اللي حاطنها ، ويش قصدك يعني ؟؟؟؟

يعني تقول أن ألغازنا سهلة مثل الليحاطنها واللي اسميها ألغاز ؟؟؟

لو جايبنها فكاهة

حل ألغازنا ولا يكثر هرجك على گولة البدوان .

[ذو الفقار]

ويش ما صارت دي ، يعني إلى هالدرجة اللغز اصعب ولا أنكم مطنشين

يالله ورونا همتكم شوي

إذا ما عرفتوا قولوا