عطونا سوالفكم

[فتى تاروت]

سلام يا شباب

والله أنا طمعان في سوالفكم

سوالف أهل أول ,,,,,,,,

والله فيه كثير من السوالف سواء عن الجن أو سوالف غريبه

أو عن العين أو القصر من أول

أو الحاله الاقتصاديه

أو الحاله الثقافية

كيف كنتوا تلعبوا أول

يعني أي شيء مشد للانتباه أو قصة تستحق القراءة

يا ريت والله كل واحد عشان في ذاك الزمن الي ما فيه مكيف ولا

تلفزيون يا ريت يقول لنا سوالفه لأننا متشوقين نسمع سوالفكم

ولا تبخلوا علينا خاصة الأخ باب العين

فتى تاروت

[أم حُسين]

أني عندي سويلفة عن عادة السعنى ؟ تعرفوها أو لا ؟

وعندس يوالف وايد من عند جدتي الله يطول عمرها بس باجمعها و أقولها ليكم و عسى تعجبكم ..

[باب العين]

طال عمرك فتى تاروت ، عندي سوالف واجد بعضها حقيفية والأخرى ربما أساطير.

اسمع هدي السالقة رواها الوالد المرحوم .

يقول لك : كان في جماعة قاعدين مقابل حمّام باشا اللي هو الحين برك عين تاروت ، واحد يبيع لومي وواحد يبيع بطيخ ، وناس يشتروا خبز.

في واحد لفت انتباهه شي غريب ، وقعد يفكر ويضرب أخماس في أسداس.

ما هو هذا الشي الغريب أو الظاهرة اللي استعجب منها داك الرجال؟

يقول لك يا طويل العمر : كان في بعض الغيران أو الجحور على جدار الحمّام ، ومن بين هدي الغيران : كانت كل ما بين فترة وفترة تجي جرادة وتدخل داخل هدا الغار ، مرة مرتين ويوم ويومين ، قال هدا الرجال لازم فيه سر والا ويش يخلي ها الجراد يجوا ويدشوا داخل هدا الغار .

قام راح وجاب وياه درج خشبي ، وركب وصار يطل على الغار وكأنه يشوف شي بس خاف يمد ايده لأن عادة هذي الغيران أو الجحور تكون جحور حيات أو فيران,

أخذ يمعن النظر ، وتشجع ومد ايده وطلع اللي في داك الغار ، تدروا ويش طلع ؟؟؟؟

؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟

طلع عصفور أعمى ! يا الله ، سبحان الله الذي تكفل برزق كل ما خلق.

ويقول طلع من داك الجحر مخلفات من الجراد ، يعني جنجان ورجايل واججججججججد.

[فتى تاروت]

يالله ريمي ننتظر سوالف جدتك

أخوي باب العين يسلم راسك أخوي العزيز

ما تقصر والله أنك رجال كذا

ما شاء الله عليك سوالفك ما تخلص ويا ريت تكتب لنا سوالف أكثر

الحقيقة وغير الحقيقية ها نثبت الموضوع :)

:)

فتى تاروت

[أم حُسين]

يا محفوظين البقى و السلامة تقول جدتي أنهم في زمن المطاقة ( المجاعة ) كانوا يغبوا الأكل بعيد في حاجة تتعلق فوق بالسقف بس نسيت ويش اسمها المهم إنها كانت تحرّص مرة على الأكل بحكم إن عندها أطفال اثنين عمي و عمتي _ أبويي لسة ما كان شرّف خخخخخخ- المهم إنها نست يوم نغبي آخر تميرتين عندها و حطتهم في القفعة على الأرض و طلعت.. يوم عودت ويش شافت ؟؟






ما شافت إلا و الفار اللعين يقروض فيهم.. ماتت من القهر و انبطت كبدها.. ويش بياكلوا هاليهال الحين ؟؟



قامت من القهر و العلة أخذت صفرية و ترستها ماي و غلته و…………………







ايه.. ايه.. يااااااااااااااااااااااااااااااي






كبته على الفرفر…… من القهر..

[ملاك القلوب]

تسلم أخوي فتى تاروت على الفكرة الرائعة ...


وما تقصر

وتسلمي أختي ريمي و أخوي باب العين:rolleyes:

[باب العين]

حتى تصلوا على محمد وآل محمد.

السالفة تقول : كان في واحد من اللي يعيشوا في النخيل في الأكواخ ، يعمروا في النخل وياكلوا منه وهم بين السواقي والماء الجاري.

في يوم من الأيام ، جلس يستريح من عناء الشغل في ديك النخيل ، سدح روحه على الأرض تحت فية كدير ( نخلة صغيرة) قريب من بيتهم ، وهو منسدح ، وادا به يشوف حية تدب على الأرض وبالهوينة تسلقت جذع نخلة كان تستند عليه العشة اللي ساكنين فيها . حتى وصلت أعلى السقف.

ما لبثت كثيرا حتى نزلت وراحت لحاجتها.

الرجال ، كان يشاهدها ، قام من سدحته ، وراح يشوف ويش عندها الحية ركبت ونزلت بسرعة .

تدروا ويش شاف ؟ شاف حيات صغار ، أولادها يعني ، هدا الرجال بغى يشوف الحية ويش تسوي لو أخد اولادها .

فعلا أخدهم وضمهم في مكان ما تدري عنهم , وصار يراقب الحية لين ما تجي وتدور على أولادها .

جت الحية وتسلقت الجدع عشان تشوف أولادها وتغديهم ، بس ما شافتهم.

أكيد جن جنونها ، والأم وما أدراك ما الأم أوصيكم بأمهاتكم خير.

نزلت والرجال يراقبها ، وراحت تدور في حوي البيت وشافت طاسة حليب أو لبن توهم حالبينه راعاة البيت ، تدروا ويش سوت في الحليب ؟

غطست راسها فيه وزوعت شي من بوزها يعني سمّته . وطلعت وراحت عنه .

هدا والرجال يطلع فعل الحية المفجوعة في أولادها ، عاد الرجال الى الحيات الصغار ، ورجعهم مكانهم في عشهم فوق سقف عشتهم. ثم عاد يراقب الوضع.

ردت الحية تدور على أولادها ، وقلب الأم دليلها كما يقولون , ردت الى عشها وادا بها ترى أولادها . في الحصن والصون.

بسرعة نزلت الحية من أعلى العريش ، تدروا ويش تبغي تسوي هادي المرة !!
-
-
-
-
-
-
-
-
-
-
-
-
-
-
-
-
-
-

هل تصورتم ؟

راحت الحية بسرع الى طاسة الحليب ودورت عىشي تخرب فيه لون الحليب أو توسخه ، صدفة حصلت منقلة فيها طفو ( رماد ) ونزلت في طاسة الحليب حتى تكون رطبة ، ثم عادت الى الرماد ومرغت جسمها فيه . ثم رجعت الى الحليب ونزلت فيه ، فعلت هدا الشي مرارا حتى توسخ الحليب ولم يعد صالح للشرب.

توتة توتة وخلصت الحدوتة . ومع السلامة .

[ملاك القلوب]

فعلاً سالفة حلوة

ويقول لك الحيوان ما عنده احساس:rolleyes: :eek:

تسلم ايدك أخوي باب العين

[أم حُسين]

سالفة جدتي #2 هي محزنة ..

تقول أن أهل أول يعيشوا في عشش و فيه ناس توها المرة والد من 40 يوم و في يوم من الغبشة قالت يوم ناموا يهالها إنها بتروح التوازي عشان تغسل ثيابها مدام ما فيه ناس وايد يمشوا يعني بتروح كم دقيقة و تعدو قبل ما يقعد الياهل..

راحت و هي مطمئنة و اتكالها على الله و ما خاب من توكل عليه ابد..



المهم يوم عوّدت من التوازي ويش شافت ؟؟؟؟؟


شافت إن عشتها تحترق ومن الخلعة و الدهشة حدفت الفياب على الأرض و صرخت و قالت للناس إن عندها أولاد 2 نايمين داخل وقاموا بسرعة و طلعوهم..
تالي يوم انطفت الحريقة اتذكرت شي..

وقامت الصرانيخ عاد..

الياهل ود 40 يوم داخل و هي من الفزعة نسته وما ذكرت إلا الكبار..

يا علي.. لعن الله يزيد…

دوروا الياهل ما شافوه..

بعد التدوير المتعب شافوه.. اسم الله عليه… طاح في ضلع جنب العشة و عطاكم عمره..


الفاتحة على أرواح المؤمنين..

[باب العين]

عندي وحدة من عند جدتي :

كانت المرحومة تعودت تاخد القيلولة بجانب السنطوانة في بيتنا اللي في الديرة ، على قطعة حصير متوسدة مشمرها .

وظلت جدتي سنين على هدي الحالة ، ماشافت لا شر ولا ضر .

وفي يوم من الأيام وهي في قيلولتها ، اذا بامرأة توقظها من النوم لا تدري أهي جنية أم انسية وقد أسدلت شعر رأسها على وجه جدتي ، وقالت لها أم على أم على گعدي وتباعدي شوي .

جلست جدتي من غفوتها وابتعدت قليلا عن السنطوانة .

قماذا حصل يا ترى؟


توها مبتعدة عن محلها واذا بحجرة ليست كبيرة ولا صغيرة سقطت من أعلى السقف ولو كانت جدتي في محلها لكسرت رأسها .

هل تصدقون ؟ لقد رأينا الحجرة وأثرها في السقف بقي حتى أزالت البلدية بيتنا.

[فتى تاروت]

مشكور اخوي ملاك القلوب على الرد على الموضوع

أخوي باب العين سوالفك ما تنمل صحيح سالفة الحية هذه حركات ما توقعت إلى هذه الدرجة !!! بس ما قلت لنا هذه السالفه شلاخ لو حقيقية

ريمي سالفتك تعور القلب !!! :( الله يرحم جميع المؤمنين والمؤمنات

باب العين وش رايك تجمع سوالف واكتبها لك وتسوي لك كتاب

ما أبي إلا 10% من الأرباح بس



فتى تاروت

[باب العين]

فتى تاروت أبشتكي عند أمي ، ولو المرحوم أبويي موجود كان يوريك .

أمزح وياك ترى مو تزعل ، خل بالك.

عزيزي فتى تاروت سلمك الله : هدي السالفة (الحية ) سمعتها من أبي وقد قال أنها حصلت في ريف تاروت ، و أنا أصدق أبي ، وعليك أنت أن تختار .

وبالنسبة للكتاب ، فستخسر وأنا أوافقك على ففتي ففتي.

لماذا تخسر لأن لا أحد يقرا كتب هذه الأيام.


ولك هذه القصة :

كان رجال من حي الحوامي أو فريق أبو براة ( قرب قرطاسية الخميس)
يدعى أبو أحمد البدراني: في يوم من الأيام وقبل ما يكون في تاروت كهرباء .

على عادة المؤمنين يجلسوا لصلاة الفجر ويروحوا المسجد يصلوا ، هذا الرجال مسجد باشلامة قريب من بيتهم ، راح المسجد في ديك الظلمية ، وادا به يرى طفل صغير يصيح ويتنصنص ودموعه تخرط أربع أربع وهو يقول : أمبى امي امبى امي .

أبو أحمد مسكه من ايده وصار يحاوره ويسأله وين امك وين أبوك ، وين بيتكم ، لاكن ما عرف منه حق ولا باطل ، قال أبو أحمد يمكن هدا لاحق أمه وهي رايحة العين وتاه عنها .

قام أبو أحمد واخد الجاهل ووداه بيتهم ، لين ما تطلع الشمس تصير أفراج.

تدروا ويش صار ؟

يقول المرحوم : آفة داك الجاهل كل شي حطوه اله أكله في طرفة عين ولو بقى في بيتهم شوي ان چان ما خلىشي الا قرضه.

قام أبو أحمد وقبل ما تطلع الشمس ، طلع وياه على الباب ، دار أبو أحمد وجهه منيه ورجع التفت للجاهل ، فص ملح وداب .؟؟؟؟

[أم حُسين]

سالفتك هذي الاخيرة جابت لي القشعريرة.......!!!!

اذا عندك بعد يا باب العين مثلها يلا زيدنا

[فتى تاروت]

لا أفا عليك يا مشرفنا أنا اتهزى عليك

أنت مصدر السوالف

بالنسبة للكتاب ما عليك نسوق له ونحطه في منتدى تاروت ونحط

منه عينة في موقع على الانترنت ومع ذالك راح يفشل لأنك مثل

ما قلت ما حد يقرأ هذه الأيام

السالفه الأخيرة سالفه الجاهل

حلوه خوفت ريمي :)

وننتظر سوالفك الباقية

فتى تاروت

[..صاحبة السمو..]

سواليفكم وايد حلوه بس عندي سؤال
كيف عايشين اول بدون كهرباء مايكون حر عليكم
او بايام الشتاء مايكون الجو بارد شلون تدفون
على ما أظن اغلب المنازل اول تكون مكشوفه صح
يعني وقت البرد بر من جد
وشنو البديل عن الكهرباء معقوله تقدرو تعيشو كذا

وفي بعض الكلمات من سوالفكم الحلوه ما عرفة المعنى ممكن توضيح اخواني مثل ((الغبشه - التوازي شنو هذي منطقه يعني ))


تحيات اختكم

صاحبة السمو